«Руханият» орталығында аудан әкімі Айтбай Жандарбековтың қатысуымен аудандық қоғамдық кеңестің кезекті отырысы өтті.
Жиынды аудандық қоғамдық кеңестің төрағасы Қаблеш Бекіш ашып, жүргізіп отырды. Күн тәртібінде «Шиелі ауданының әлеуметтік-экономикалық даму қорытындылары» мәселесі қаралды.
Жиында аудан әкімі Айтбай Жандарбеков баяндама жасап, өңірде атқарылған ауқымды жұмыстарға кеңінен тоқталды. Атап айтқанда, инфрақұрылымды дамыту, жол жөндеу, құрылыс саласы, ауыл шаруашылығы мен кәсіпкерлікті қолдау бағытында жүзеге асқан жобалар туралы нақты деректер келтірді.
Сонымен қатар, Мемлекет басшысының бастамасымен жүзеге асырылып жатқан «Таза Қазақстан» республикалық экологиялық бағдарламасы аясында кент орталығын көркейту, көгалдандыру, санитарлық тазалық жұмыстарын жүйелеу бағытындағы шаралар сөз болды. «Ауыл аманаты» жобасы шеңберінде шағын және орта бизнесті дамытуға берілетін жеңілдетілген несиелер көлемін арттыру, жаңа жұмыс орындарын ашу және ауыл тұрғындарының табысын көбейту мәселелері де кеңінен қамтылды.
Бұдан бөлек, жаңа Ата Заңының жобасы аясында енгізілетін өзгерістер мен толықтырулар жөнінде түсіндірме беріліп, оның ел дамуына, басқару жүйесін жетілдіруге және азаматтардың құқықтарын қорғауға бағытталған негізгі басымдықтары айтылды.
Кездесу барысында қоғамдық кеңес мүшелері өз ұсыныс-пікірлерін білдіріп, әлеуметтік мәселелер, инфрақұрылым, кәсіпкерлікті қолдау және экологиялық ахуалға қатысты бірқатар сауалдарын жолдады. Аудан әкімі көтерілген мәселелерге нақты жауап беріп, орынды ұсыныстар ескерілетінін жеткізді.
