Бүгін облыс әкімі Нұрлыбек Нәлібаев қатысуымен «Өнер орталығында» 8 наурыз – **Халықаралық әйелдер күні**не арналған «Ана – әлемнің бесігі» атты салтанатты шара өтті. Аймақ басшысы аналар мен қыз-келіншектерді көктем мерекесімен құттықтап, қоғам мен мемлекет дамуына әйелдердің қосып жүрген үлесі зор екенін атап өтті.
Облыс бойынша мемлекеттік қызметшілердің 45 пайызы, медицина саласының 88 пайызы, ұстаздардың 78 пайызы, ал жалпы бюджеттік саланың 62 пайызы – әйелдер. Сондай-ақ шағын және орта бизнесте еңбек ететіндердің 55 пайызы қыз-келіншектер.
Салтанатты шарада Мемлекет басшысының Жарлығымен бірқатар қызылордалық әйелдер «Парасат», «Құрмет» ордендерімен және «Ерен еңбегі үшін» медалімен марапатталды. Сонымен қатар «Мәдениет саласының үздігі» төсбелгісі, облыстың Құрмет грамотасы мен облыс әкімінің Алғыс хаты табысталды.
Өңірде 48 мыңнан астам көпбалалы отбасы бар, оның 17 мыңға жуығы «Алтын алқа» және «Күміс алқа» иегерлері. Аймақта аналарды қолдау, отбасы институтын нығайту бағытында жүйелі жұмыстар жүргізілуде.
Соның бірі – кәсіпкер Марат Дүйсенбаев демеушілігімен салынған «Анаға тағзым» орталығы. Екі жыл ішінде орталықта 40 мыңға жуық ана мен қыз-келіншекке қызмет көрсетілді. Сонымен қатар өңірдің барлық аудандарында «Руханият орталықтары» ашылып, мәдени-рухани жұмыстар жүргізілуде.
