Шиелі ауданында құқық бұзушылықтың алдын алу және сыбайлас жемқорлыққа қарсы іс-қимыл мәселелері талқыланған маңызды жиын өтті. Аудан әкімдігінің мәжіліс залында өткен отырысқа аудан әкімі Айтбай Жандарбеков төрағалық етті. Басқосуға мәслихат төрағасы, аудан прокуроры, ұлттық қауіпсіздік органдарының өкілдері, әкім орынбасарлары, сондай-ақ бөлім басшылары мен ауылдық округ әкімдері қатысты.
Күн тәртібінде ведомствоаралық комиссияның және сыбайлас жемқорлыққа қарсы іс-қимыл жөніндегі комиссияның бірінші тоқсандағы жұмыстары қаралды. Жиында аудан көлеміндегі құқық бұзушылықтың жай-күйі мен оның алдын алу шаралары кеңінен сөз болды.
Шиелі аудандық полиция бөлімі бастығының орынбасары Досым Абуов 2025 жылдың қорытындысы бойынша қылмыстық ахуалға тоқталып, құқық бұзушылықтың өсуіне әсер еткен факторларды атап өтті. Сонымен қатар, кәмелетке толмағандар арасындағы құқық бұзушылықтың алдын алу бағытында жүргізіліп жатқан жұмыстар жайын баяндады.
Бұдан бөлек, аудандық білім бөлімінің басшысы Дауренбек Насибеков, ауыл шаруашылығы және жер қатынастары бөлімінің басшысы Мұрат Әшірбеков өз салаларындағы сыбайлас жемқорлықтың алдын алу шаралары туралы есеп берді. Ал көпбейінді орталық аурухананың өкілі Қазыбек Шәукебаев денсаулық сақтау мекемесінде атқарылған жұмыстарды таныстырды.
Жиын қорытындысында аудан әкімі жауапты тұлғаларға нақты міндеттер жүктеп, құқық бұзушылықты азайту, сыбайлас жемқорлыққа қарсы күресті күшейту және қоғамдық тәртіпті сақтау бағытында жүйелі әрі нәтижелі жұмыстар жүргізуді тапсырды.
