Қорқыт Ата атындағы Қызылорда университеті базасында «Инжинирингтік паркінің» іргетасын қалау рәсімі өтті. Салтанатты шараға облыс әкімі Нұрлыбек Нәлібаев, Парламент депутаттары Руслан Рүстемов, Мұрат Әбенов, Мархабат Жайымбетов, Мұрат Ергешбаев қатысып, маңызды жобаның басталуына куә болды.
Аймақ басшысы жиналған қауымды құттықтап, жаңа бастамаға сәттілік тіледі. Ол өз сөзінде Қасым-Жомарт Тоқаев белгілеген цифрландыру бағыты мен жасанды интеллектіні дамыту – ел экономикасының негізгі басымдықтарының бірі екенін атап өтті.
Сондай-ақ, 2023 жылы өңір делегациясының Оңтүстік Кореяға жасаған сапары барысында халықаралық әріптестік байланыстар нығайғаны айтылды. Нәтижесінде Сеул ұлттық ғылым және технология университетімен бірлесіп, университетте еліміздегі алғашқы Жасанды интеллект институты ашылды. Қазіргі таңда мұнда 240 студент білім алып, оның бір бөлігі қосдипломды бағдарламалар бойынша оқуда.
Жаңа «Инжинирингтік парк» – ұзақ жылдардан бері салынбаған заманауи оқу ғимараттарының орнын толықтыратын, ғылым мен инновацияны дамытуға серпін беретін маңызды нысан болмақ. Бұл жоба өңір жастарының әлеуетін арттырып, олардың ғылыми ізденістерін жүзеге асыруға мүмкіндік береді.
Бүгінде 90 жылдық тарихы бар оқу орнында 580-нен астам профессор-оқытушы қызмет етеді. 155 мамандық бойынша 11 мыңнан астам студент білім алуда. Соңғы жылдары университеттің материалдық-техникалық базасы жаңартылып, ғылыми жобаларға бөлінетін қаржы көлемі артқан. Сонымен қатар, студенттердің стартап жобаларын қолдайтын бизнес-инкубация орталығы жұмыс істейді.
Осының нәтижесінде 2020–2025 жылдар аралығында университет алғаш рет халықаралық рейтингтерге еніп, білім мен ғылым саласында өз орнын нығайта түсті.
