Сырдария ауданында Мемлекет басшысының бастамасымен қолға алынған жалпыұлттық және Наурызнама онкүндігі аясында кең көлемді тал егу жұмыстары өткізілді. Игі шараға аудан әкімі Берік Сәрменбаев, аудан ардагерлері, аудандық мәслихат депутаттары, сондай-ақ ерікті жастар мен қоғам белсенділері қатысты.
Акция басталар алдында аудан басшысы жиылған қауымды Ұлыстың ұлы күні – Наурыз мерекесімен құттықтап, елдегі жаңару мен бірліктің маңызын атап өтті. Ол өз сөзінде Президенттің бастамасымен елімізде жүзеге асырылып жатқан «Таза Қазақстан» экологиялық акциясының мәні мен маңыздылығына тоқталып, өңірде атқарылып жатқан әлеуметтік-экономикалық және мәдени жетістіктерге шолу жасады. Сонымен қатар, тұрғындарды тазалық пен табиғатты қорғау шараларына белсенді қатысуға, туған жерге жанашырлықпен қарауға шақырды.
Тал егу акциясы барысында аудан аумағында көшеттерді отырғызумен қатар, қалалық және ауылдық жерлерде санитарлық тазалау жұмыстары да ұйымдастырылды. Жаппай сенбілік барысында қоқыс жинау, көшелер мен қоғамдық орындарды тазалау, гүлзарлар мен аллеяларды күтіп-баптау сияқты шаралар іске асырылды.
Еріктілер мен жастар ерекше белсенділік танытып, тал егу мен аумақты абаттандыру жұмыстарында үлгілі үлес қосты. Мұндай бастамалар тұрғындардың экологиялық мәдениетін арттырып қана қоймай, келешек ұрпаққа таза табиғи орта қалдыруға зор ықпал етеді.
Сонымен қатар, акция аясында отырғызылған әр тал – табиғатқа жасалған нақты қадам ғана емес, сонымен қатар Наурыз мерекесінің символдық мәнін де білдіреді. Көктемгі жаңарудың, ел бірлігінің және жерге деген махаббаттың көрінісі ретінде тал көшеттері аудан тұрғындарына рухани шабыт беріп, қоғамда экологиялық жауапкершілікті арттыруға септігін тигізеді.
Осылайша, «Таза Қазақстан» акциясы мен Наурызнама онкүндігі аясындағы бұл игі бастама экологиялық білімді насихаттап қана қоймай, ұлттық мерекені атап өтуге ерекше сән беріп, Сырдария ауданының тазалығы мен көркеюіне нақты үлес қосқан шара ретінде есте қалды.
