Бүгін Шиелі ауданында «Таза Қазақстан» республикалық экологиялық акциясы аясында кезекті жалпыхалықтық сенбілік ұйымдастырылып, тазалық жұмыстары кең ауқымда жүргізілді.
Аудан әкімі Айтбай Жандарбеков өңірдегі экологиялық ахуал мен санитарлық тазалықты қамтамасыз етуді басты басымдықтардың бірі ретінде айқындап келеді. Осыған сәйкес, аудан аумағында абаттандыру, көгалдандыру және тазалықты сақтау бағытындағы жұмыстар жүйелі түрде жүзеге асырылып отыр.
Сенбілікке аудан орталығы мен барлық ауылдық округтердің тұрғындары, мемлекеттік мекемелердің қызметкерлері, білім беру және денсаулық сақтау ұйымдарының ұжымдары, сондай-ақ жастар ұйымдары мен еріктілер белсенді түрде қатысты. Бірлескен еңбек нәтижесінде көшелер мен қоғамдық орындар тазартылып, жиналған тұрмыстық қалдықтар арнайы орындарға шығарылды.
Сонымен қатар, қоршаған ортаны көркейту мақсатында ағаш көшеттерін отырғызу жұмыстары да қатар жүргізілді. Бұл шаралар елді мекендердің келбетін жақсартып қана қоймай, экологиялық тепе-теңдікті сақтауға да ықпал етпек.
Мамандардың айтуынша, мұндай сенбіліктер тұрғындардың табиғатқа деген жанашырлығын арттырып, ортақ жауапкершілікті қалыптастыруға негіз болады. Ауданның санитарлық жағдайын жақсарту мен экологиялық мәдениетті дамыту бағытындағы жұмыстар алдағы уақытта да жалғасады.
Айта кетейік, «Таза Қазақстан» акциясы аясындағы тазалық және абаттандыру шаралары тұрақты түрде өткізіліп, аудан тұрғындарын ортақ іске белсенді қатысуға шақыру жұмыстары жүйелі жүргізіле береді.
