Қызылорда облысында Қасым-Жомарт Тоқаев бастамашы болған «Таза Қазақстан» экологиялық бағдарламасы аясында «Тағзым орны таза болсын, рух пен тазалық – бір ұғым» атты жалпыхалықтық акция ұйымдастырылды. Іс-шара облыс әкімдігінің қолдауымен өтті.
Акция барысында өңірдегі тарихи-мәдени ескерткіштер, киелі орындар мен зират аумақтарында ауқымды абаттандыру және көгалдандыру жұмыстары жүргізілді. Қатысушылар ағаш отырғызып, қоршауларды ретке келтіріп, жолдарды тазалау және жөндеу жұмыстарын атқарды.
Игі бастамаға облыс тұрғындарымен қатар мәслихат депутаттары, ардагерлер, зиялы қауым өкілдері, мемлекеттік қызметкерлер, Қазақстан халқы ассамблеясының мүшелері, қоғамдық ұйымдар және жастар белсенді түрде атсалысты.
Мемлекет басшысы «Таза Қазақстан» бастамасының мәнін айқындап, тазалықтың тек қоршаған ортамен шектелмейтінін, оның ой-сана мен рухани мәдениеттің ажырамас бөлігі екенін атап өткен болатын. Бұл ұстаным акцияның мазмұнын айқындай түсті.
Қазақ халқының дәстүрінде киелі орындарды күтіп-ұстау – ұрпақ парызы. «Өлі разы болмай, тірі байымайды» деген нақыл өткенге құрмет көрсетудің маңызын айғақтайды. Қорымдар мен кесенелер халық үшін тек жерлеу орны емес, ата-баба рухына тағзым ететін қасиетті кеңістік саналады.
Облыс бойынша 72 нысан киелі орындар тізіміне енгізілген. Соңғы жылдары бұл нысандарда жергілікті бюджет пен демеушілер есебінен жөндеу және реставрация жұмыстары жүргізіліп, инфрақұрылымы жақсартылған.
Акция аясында өңірдегі 200-ге жуық қасиетті орын мен зират аумағы тазартылып, 20 мыңнан астам тұрғын белсенділік танытты.
Мамандардың айтуынша, мұндай бастамалар қоғамда экологиялық мәдениетті қалыптастырып қана қоймай, ұлттық құндылықтарға деген құрметті арттыруға ықпал етеді. Бұл бағыттағы жұмыстар алдағы уақытта да жалғасады.
