Шиелі ауданындағы маңызды мәдени-ағартушылық орталықтардың бірі — Шиелі аудандық тарихи-өлкетану музейі базасында жас ұрпаққа бағыт-бағдар беретін тағылымды шара өтті. «Мамандық таңдау» тақырыбымен ұйымдастырылған дөңгелек үстелге мектеп оқушылары мен ұстаздар қатысып, түрлі сала мамандарымен ашық әрі мазмұнды пікір алмасты.
Іс-шараның басты мақсаты – оқушыларға болашақ кәсібін саналы түрде таңдауға көмектесу, еңбек нарығындағы түрлі мамандықтардың қыр-сырын түсіндіру және жастардың кәсіби бағдарын айқындауға ықпал ету болды. Кездесу барысында шақырылған қонақтар өздерінің өмірлік тәжірибелерімен бөлісіп, таңдаған мамандықтарының ерекшеліктері, қиындықтары мен артықшылықтары жайында кеңінен әңгімеледі.
Атап айтқанда, Жантас Қасымов, Мейіржан Ибрагимов және Алмас Сармантаев жастармен еркін сұхбат құрып, өз салаларының маңыздылығы мен қоғамдағы рөлі туралы мазмұнды ой қозғады. Әсіресе, олардың кәсіби жолындағы тәжірибелері мен жеке өмірлік ұстанымдары оқушылар үшін үлкен мотивация болды.
Кездесу барысында оқушылар көкейлеріндегі сұрақтарын қойып, мамандардан нақты әрі пайдалы жауаптар алды. Олар еңбек жолын қалай бастау керектігі, дұрыс таңдау жасаудың жолдары, қазіргі заман талап ететін дағдылар мен білімдер туралы маңызды мәліметтерге қанықты.
Іс-шараны музейдің ғылыми қызметкері Бекболат Әбутегі жүргізіп, жиынның мазмұнды әрі жүйелі өтуіне үлес қосты.
Мұндай кездесулердің маңызы зор. Себебі, жасөспірімдер үшін мамандық таңдау – өмірлік маңызды шешімдердің бірі. Ал тәжірибелі мамандармен жүздесу олардың ой-өрісін кеңейтіп, болашаққа деген сенімін нығайтады.
Жалпы, «Мамандық таңдау» атты дөңгелек үстел жас ұрпақтың саналы шешім қабылдауына жол ашып, олардың кәсіби бағыт-бағдарын айқындауға оң әсерін тигізген тағылымды шара болды.
