Қазақстан Республикасының қолданыстағы заңнамасына сәйкес, алкоголь өнімдерін өткізу тәртібі қатаң бақылауға алынған. Әсіресе, Сырдария ауданында алкоголь өнімдерін белгіленбеген уақытта сату фактілерінің алдын алу мақсатында түсіндірме және профилактикалық жұмыстар тұрақты түрде жүргізілуде.
Мамандардың айтуынша, алкоголь өнімдерін заңсыз сату қоғамдық тәртіпке, тұрғындардың қауіпсіздігіне және құқықбұзушылық деңгейінің артуына тікелей әсер етеді. Осыған байланысты Қазақстан Республикасының Әкімшілік құқық бұзушылық туралы кодексінде алкоголь өнімдерін сату уақыты нақты белгіленген.
Қолданыстағы талаптарға сәйкес, алкоголь өнімдерін түнгі уақытта, яғни сағат 23:00-ден 08:00-ге дейін сатуға заңмен тыйым салынады. Бұл талап қоғамдық тыныштықты сақтау, қылмыс пен құқықбұзушылықтың алдын алу, сондай-ақ тұрғындардың қауіпсіздігін қамтамасыз ету мақсатында енгізілген.
Осыған орай, сауда үйлері мен дүкен иелеріне заң талаптарын қатаң сақтау қажеттігі ескертілді. Атап айтқанда:
– алкоголь өнімдерін тек заңда белгіленген уақыт аралығында сату;
– түнгі уақытта алкоголь өнімдерін өткізуге жол бермеу;
– сатушылар мен кассирлерге заң талаптарын тұрақты түрде түсіндіру;
– бейнебақылау жүйелерінің үздіксіз жұмысын қамтамасыз ету;
– кәмелетке толмаған тұлғаларға алкоголь өнімдерін сатпау талаптарын сақтау қажеттігі айтылды.
Мамандардың пікірінше, заң талаптарын сақтау – кәсіпкердің міндеті ғана емес, қоғам алдындағы жауапкершілігі. Себебі алкоголь өнімдерін заңсыз сату түрлі құқықбұзушылықтар мен келеңсіз жағдайлардың туындауына себеп болуы мүмкін.
Сонымен қатар, рейдтік және бақылау шаралары барысында заң талаптарын бұзу деректері анықталған жағдайда, кәсіпкерлік нысандарына қатысты әкімшілік шаралар қолданылатыны ескертілді. Атап айтқанда, құқықбұзушыларға айыппұл салынып, қайталанған жағдайда сауда қызметін шектеу немесе лицензиясына қатысты тиісті шаралар қабылдануы мүмкін.
Құзырлы органдар кәсіпкерлерді заң талаптарын сақтауға шақырып, қоғамдық тәртіп пен тұрғындардың қауіпсіздігіне бейжай қарамауға үндеді. Алкоголь өнімдерін заң талаптарына сай сату – қоғам тұрақтылығы мен тәртіптің маңызды кепілі екені атап өтілді.
