Аудан әкімдігінде өткен мәжіліске дербес бөлім басшылары, кент және ауылдық округ әкімдері, сондай-ақ бірқатар мекеме жетекшілері қатысты. Күн тәртібінде тұрғын үй құрылысын дамыту және саланы цифрландыру мәселелері қаралды.
Жиында аудан бойынша соңғы үш жыл ішінде тұрғын үй кезегінде тұрған азаматтарды баспанамен қамтамасыз ету бағытында атқарылған жұмыстар талқыланды. Осы кезеңде жалпы саны 280 пәтер сатып алынып, тұрғын үйге мұқтаж азаматтарға заңнамаға сәйкес кезектілік тәртібімен беріліп келеді.
Мәселен, 2023 жылы халықтың әлеуметтік осал топтарына арналған 50 тұрғын үй сатып алуға 506,8 млн теңге бөлінді.
Ал 2024 жылы барлығы 178 пәтер сатып алынған. Оның ішінде әлеуметтік жағынан әлсіз топтарға мемлекеттік сатып алу конкурсы арқылы 21 пәтер алуға Ұлттық қордан 266,9 млн теңге қарастырылды. Сонымен қатар облыстық бюджеттен 2 млрд 662 млн 238 мың теңге бөлініп, Шиелі ауданында тұрғын үй кезегінде тұрған азаматтарға кейіннен сатып алу құқығымен жалға беру тетігі арқылы 157 пәтер алынған.
2025 жылы да бұл бағыттағы жұмыстар жалғасып, аудан тұрғындарының әлеуметтік осал топтары үшін Шұғыла шағын ауданынан 52 пәтер сатып алуға 775 млн 800 мың теңге қарастырылған.
Мәжіліс барысында аудандық құрылыс, сәулет және қала құрылысы бөлімінің міндетін атқарушы Нұршат Бағдатұлы баяндама жасап, өңірдегі құрылыс қарқыны, тұрғын үй саласын дамыту және цифрландыру бағытында атқарылып жатқан жұмыстар жөнінде кеңінен ақпарат берді.
Жиын қорытындысында аудан әкімі Айтбай Жандарбеков жауапты сала басшыларына тұрғындарды баспанамен қамту жұмыстарын жүйелі түрде жалғастыруды, құрылыс сапасын тұрақты бақылауда ұстауды және цифрлық жүйелерді тиімді енгізуді тапсырды.
