Сырдария ауданында рухани-мәдени бағыттағы маңызды әдеби іс-шара өтті. Қазақстан Журналистер одағының мүшесі, «Тіл жанашыры» белгісінің иегері, белгілі журналист әрі аудармашы Дәметкүл Қонысбайқызы Құмақбайдың «Қаламым – қанатым» атты жаңа кітабының тұсаукесер рәсімі ұйымдастырылды.
Аталған шара қаламгердің шығармашылық еңбегін насихаттап, оның журналистика мен аударма саласындағы ұзақ жылдық тәжірибесін көпшілікке кеңінен таныстыруды мақсат етті. Кітаптың тұсаукесері аясында автордың өмір жолы, кәсіби қалыптасуы және қаламгерлік ізденістері туралы мазмұнды ойлар айтылып, шығармашылық тұлғаның еңбегі жоғары бағаланды.
Жаңа туындыда автордың өмірлік тәжірибесі, қоғамға деген көзқарасы, ішкі толғаныстары мен шығармашылық ізденістері көрініс тапқан. Қаламгердің әрбір еңбегі оқырманға ой салатын терең мазмұнымен ерекшеленетіні атап өтілді.
Іс-шараға зиялы қауым өкілдері, қаламгердің әріптестері, сондай-ақ аудандық кітапхана оқырмандары қатысты. Жиын барысында қатысушылар автор шығармашылығы жөнінде жылы лебіздерін білдіріп, оның қазақ журналистикасы мен аударма саласының дамуына қосқан үлесіне ерекше тоқталды.
Сонымен қатар, кеш аясында «Қаламгердің көркем әлемі» атты кітап көрмесі ұйымдастырылып, көпшілік назарына ұсынылды. Көрмеде автордың бұрынғы еңбектері мен шығармашылық жолын айқындайтын материалдар қойылып, оқырмандарға кеңінен таныстырылды.
Рухани мазмұны терең өткен бұл әдеби кеш көпшілікке ерекше әсер қалдырды. Қатысушылар қаламгер шығармашылығы арқылы ұлттық әдебиетке деген қызығушылықтың артып келе жатқанын атап өтіп, мұндай іс-шаралардың жастардың рухани дамуына ықпал ететінін жеткізді.
