Жазғы демалыс – балалар үшін асыға күтетін көңілді кезеңдердің бірі. Алайда дәл осы уақытта кәмелетке толмағандар арасындағы түрлі құқық бұзушылықтар мен жазатайым оқиғалардың жиі орын алатыны белгілі. Осыған байланысты аудан прокуратурасының бастамасымен білім бөлімі және уәкілетті мемлекеттік органдардың қатысуымен мектеп қабырғасында оқушылар, ата-аналар және мұғалімдерге арналған «Қауіпсіз жазғы демалыс» тақырыбында кездесу ұйымдастырылды.
Тағылымды шараның басты мақсаты – жаз мезгілінде балалардың қауіпсіздігін қамтамасыз ету, олардың бос уақытын тиімді ұйымдастыру, құқық бұзушылықтардың алдын алу және ата-аналардың жауапкершілігін арттыру болды.
Кездесу барысында сала мамандары оқушыларға жазғы демалыс кезінде жиі кездесетін қауіп-қатерлер жөнінде жан-жақты түсіндіру жұмыстарын жүргізді. Әсіресе, су айдындарындағы қауіпсіздік мәселесіне ерекше назар аударылып, рұқсат етілмеген жерлерде шомылудың қауіптілігі айтылды. Мамандар балаларға суға жалғыз бармау, қауіпсіздік ережелерін сақтау және төтенше жағдай кезінде дұрыс әрекет ету жолдарын түсіндірді.
Сонымен қатар, жол қозғалысы ережелерін сақтау мәселесі де кеңінен қозғалды. Жасөспірімдерге жолдан өту тәртібі, велосипед пен электрлі самокаттарды пайдалану кезіндегі қауіпсіздік талаптары, түнгі уақытта көшеде жүрудің салдары жөнінде нақты мысалдар келтірілді.
Кездесу барысында өрт қауіпсіздігі тақырыбына да тоқталып, балаларға отпен ойнаудың қауіптілігі, тұрмыстық электр құралдарын дұрыс пайдалану және төтенше жағдай туындаған кезде жедел қызметтерге хабарласу тәртібі түсіндірілді.
Қазіргі қоғамдағы өзекті мәселелердің бірі – интернет қауіпсіздігі де назардан тыс қалмады. Мамандар әлеуметтік желілер мен түрлі интернет платформаларында кездесетін қауіптер, алаяқтық әрекеттер, кибербуллинг және күмәнді ақпараттардан сақтану жолдары туралы кеңінен айтып өтті. Оқушыларға жеке мәліметтерді бөгде адамдарға бермеу, интернеттегі бейтаныс тұлғалармен байланысқа түспеу қажеттігі ескертілді.
Шара барысында ата-аналардың бала тәрбиесіндегі рөлі мен жауапкершілігіне де ерекше көңіл бөлінді. Қатысушыларға кәмелетке толмағандардың заңды өкілінсіз түнгі уақытта жүруіне жол бермеу, балалардың бос уақытын бақылауда ұстау және олардың қауіпсіздігін қамтамасыз ету әрбір ата-ананың басты міндеті екені түсіндірілді.
Сондай-ақ, жасөспірімдер арасындағы құқық бұзушылықтың алдын алу, балалардың құқықтары мен заңды мүдделерін қорғау мәселелері бойынша түсіндірме жұмыстары жүргізілді. Қатысушылар тарапынан қойылған сұрақтарға сала мамандары нақты жауап беріп, құқықтық кеңестер ұсынды.
Іс-шара соңында оқушыларға қауіпсіздік жадынамалары таратылып, жазғы демалыс кезінде сақталуы тиіс негізгі ережелер тағы бір мәрте еске салынды.
Аудан прокуратурасы тұрғындарды балалардың қауіпсіздігіне бейжай қарамауға шақырып, жазғы демалыс кезеңінде қауіпсіздік талаптарын қатаң сақтау – әрбір азаматтың ортақ міндеті екенін атап өтті.
