15 мамыр – Халықаралық отбасы күніне орай Шіркейлі ауылында “Жұбайлар жыры” атты өнерлі отбасылардың ән байқауы жоғары деңгейде ұйымдастырылды. Тағылымы мол мәдени шараға аудан әкімі Берік Сәрменбаев қатысып, тұрғындарды мерекемен құттықтады.
Отбасы құндылықтарын дәріптеуді мақсат еткен мерекелік кеш ауыл тұрғындары мен қонақтарының ерекше ықыласына бөленді. Шара аясында ұлттық салт-дәстүр мен отбасы тәрбиесін насихаттайтын арнайы көрме ұйымдастырылып, көпшілік назарына ұлттық мұралар, қолөнер бұйымдары және отбасылық шығармашылық жұмыстар ұсынылды. Көрмеде қазақы тәрбиенің мәйегі саналатын ұлттық құндылықтар кеңінен дәріптеліп, жас ұрпаққа өнеге болатын дүниелер көпшілікке таныстырылды.
Салтанатты шара барысында сөз сөйлеген аудан әкімі отбасының қоғамдағы рөліне ерекше тоқталып, берекелі жанұя – мемлекеттің тұрақты дамуының басты тірегі екенін атап өтті.
— Мемлекет басшысы Қасым-Жомарт Тоқаев «Берекелі шаңырақ – елімізді үйлесімді әрі орнықты дамытудың мызғымас кепілі» деп атап өткен болатын. Сондықтан отбасы институтын нығайту, ана мен баланы қорғау, ұлттық құндылықтарды ұлықтау – мемлекеттік саясаттың маңызды бағыттарының бірі. Бүгінде қоғамда еңбекқорлық, білімпаздық, сыйластық секілді қасиеттерді дәріптеу арқылы саналы ұрпақ тәрбиелеуіміз қажет. Осы бағытта өңірімізде жүйелі жұмыстар атқарылып келеді, — деді Берік Әбдіғаппарұлы.
Сондай-ақ аудан басшысы аймақта жүзеге асып жатқан рухани-мәдени жобаларға тоқталып, облыс орталығында ашылған “Отбасы орталығы”, “Анаға тағзым”, “Өнер орталығы” секілді нысандардың халық игілігіне қызмет етіп жатқанын жеткізді. Бұдан бөлек, мәдениет үйлері жанынан құрылған “Адал адам” рухани-мәдени орталықтары мен аудан орталығындағы “Руханият” орталығы ұлттық тәрбиені жаңғыртуға айрықша үлес қосып отырғанын айтты.
Байқауға барлығы жеті өнерлі жұп қатысып, өзара бақ сынады. Қатысушылар отбасылық құндылықтарды, сыйластық пен махаббатты арқау еткен әндерді орындап, көрермендердің ыстық ықыласына ие болды. Әрбір жұптың сахнадағы өнері мен жарасымды үлгісі көпшілікке көтеріңкі көңіл күй сыйлады.
Өнер сайысының қорытындысы бойынша үздік деп танылған жұптарға Бас жүлде, І, ІІ және ІІІ дәрежелі орындар табысталып, арнайы дипломдар мен бағалы сыйлықтар берілді. Мерекелік кеш отбасы бірлігі мен ұлттық тәрбиенің маңызын айшықтаған тағылымды шара ретінде есте қалды.
