2026 жылғы 5 мамыр күні аудандық “Руханият” орталығында жасөспірімдер арасында суицидтің алдын алуға бағытталған кең ауқымды ақпараттық-түсіндірме шарасы ұйымдастырылды. Маңызы зор кездесуге білім беру ұйымдарының өкілдері, атап айтқанда мектеп директорларының тәрбие ісі жөніндегі орынбасарлары, педагог-психологтар, әлеуметтік педагогтар және ата-аналар қауымы қатысты.
Іс-шараның басты мақсаты – жасөспірімдердің психологиялық саулығын нығайту, олардың бойындағы күйзеліс пен ішкі алаңдаушылықтың алдын алу, сондай-ақ отбасы мен мектеп арасындағы байланысты күшейту арқылы қауіптің алдын алу жолдарын түсіндіру болды. Жиында қатысушыларға бүгінгі қоғамдағы өзекті мәселелердің бірі – жасөспірімдер арасындағы суицидтің себептері мен салдары, оны болдырмаудың тиімді тәсілдері жан-жақты талқыланды.
Шара барысында Облыстық психологиялық қолдау орталығының әдістемелік кабинет меңгерушісі Жания Жоямергенқызы Бисенова арнайы баяндама жасап, қатысушылармен тәжірибелік ұсыныстарымен бөлісті. Ол өз сөзінде жасөспірімдердің психоэмоционалдық жағдайына дер кезінде көңіл бөлу, олардың мінез-құлқындағы өзгерістерді байқау және ата-ана мен педагог арасындағы тығыз байланыстың маңыздылығына тоқталды. Сонымен қатар, бала тәрбиесіндегі отбасының рөлі мен сенімді қарым-қатынас орнатудың қажеттілігіне ерекше назар аударды.
Жиын аясында тәрбиелік мәні зор «Өмір сақшылары» атты фильмнің көрсетілімі ұйымдастырылды. Фильм мазмұны арқылы қатысушыларға өмірдің құндылығы, қиындықтарды еңсерудің маңызы және жақын жандардың қолдауының рөлі тереңінен жеткізілді. Көрсетілімнен кейін қатысушылар өзара пікір алмасып, ой бөлісті.
Жалпы, мұндай кездесулер қоғамдағы өзекті мәселелерді ашық талқылауға мүмкіндік беріп қана қоймай, ата-аналар мен мамандардың бірлесе әрекет етуіне жол ашады. Мамандардың пікірінше, жүйелі түрде жүргізілетін осындай алдын алу шаралары жасөспірімдердің қауіпсіздігін қамтамасыз етуде маңызды рөл атқарады.
