Сырдария ауданында Ұлы Отан соғысының ардагері, І дәрежелі орден иегері әрі «Ерлігі үшін» медалімен марапатталған Әсербай Айкупешовтың өмірі мен ерлігіне арналған тағылымды көрме өтті. «Сырдария аудандық архиві» филиалы ұйымдастырған «Ұрпағына мұра болған ерлік» атты шарада батырдың жеке тектік қорынан алынған құжаттар көпшілік назарына ұсынылды.
Көрмеге ардагердің келіні Раушан Құлмаханова, №35 Иса Тоқтыбаев атындағы мектеп-лицейінің 7-сынып оқушылары мен олардың ұстазы қатысып, тарихи тағылымы мол деректермен танысты. Іс-шараның басты мақсаты – елге еңбегі сіңген тұлғаның өнегелі өмір жолын насихаттап, оның кейінгі ұрпаққа қалдырған рухани мұрасын кеңінен таныстыру.
Шараны архив филиалының басшысы Ж. Сейлов ашып, қатысушыларға көрменің маңызын түсіндіріп, Ұлы Отан соғысы ардагерлерінің ерлігі туралы мазмұнды мәліметтер берді. Оның айтуынша, мұндай шаралар жас ұрпақтың тарихи санасын қалыптастырып, елжандылық қасиеттерін нығайтуда ерекше рөл атқарады.
Көрме барысында архивист Ж. Ермаханов келушілерді Әсербай Айкупешовтың 1943–2017 жылдар аралығын қамтитын жеке құжаттарымен таныстырды. Экспозицияда соғыс жылдарында алған ордендері мен медальдарының куәліктері, түрлі марапаттары мен құттықтау хаттары, сирек фотосуреттері және баспасөз беттерінде жарияланған мақалалары қойылған. Бұл деректер арқылы ардагердің майдандағы және бейбіт өмірдегі еңбегі жан-жақты көрініс тапқан.
Өз кезегінде Раушан Құлмаханова оқушыларға қайын атасының майдандағы қиын-қыстау кезеңдердегі естеліктерін айтып, оның батырлығы мен қайсарлығы туралы әсерлі әңгіме өрбітті. Бұл жас буынға ерекше әсер қалдырды.
Көрме соңында қатысушылар ардагердің өмірі мен ерлігі туралы мол мағлұмат алып, архив қызметкерлеріне алғыстарын білдірді. Тағылымды шара жастардың тарихи тұлғаларға деген құрметін арттырып, ел тарихына деген қызығушылығын оятты.
