Шиелі ауданында Мемлекет басшысының бастамасымен жүзеге асып жатқан «Таза Қазақстан» республикалық экологиялық акциясы аясында кезекті сенбілік ұйымдастырылды. Тазалық жұмыстарына аудан тұрғындары мен түрлі мекеме қызметкерлері белсенді атсалысты.
Аудан әкімі Айтбай Жандарбеков өңірдегі экологиялық жағдай мен санитарлық тазалық мәселелерін әрдайым басты назарда ұстап келеді. Осыған орай аудан басшысының тапсырмасына сәйкес аумақты абаттандыру, көгалдандыру және тазалық жұмыстарын жүйелі жүргізу бағытындағы шаралар тұрақты түрде жүзеге асырылуда.
Бұл жолғы сенбілікке аудан орталығы мен барлық ауылдық округтердің тұрғындары, дербес бөлім қызметкерлері, білім беру және денсаулық сақтау мекемелерінің ұжымдары, жастар ұйымдары мен еріктілер қатысты. Қатысушылар көшелер мен қоғамдық орындарды қоқыстан тазартып, жол жиектерін, арық-атыздарды, саябақтар мен демалыс аймақтарын ретке келтірді.
Мұндай бастамалар тұрғындардың табиғатқа деген жауапкершілігін арттырып, ауданның санитарлық жағдайын жақсартуға және өңірдің көркеюіне оң әсерін тигізіп отыр. Сонымен қатар тазалық шаралары арқылы қоғамда экологиялық мәдениетті қалыптастыруға да ерекше мән берілуде.
Айта кетейік, «Таза Қазақстан» акциясы шеңберіндегі тазалық және абаттандыру жұмыстары алдағы уақытта да жалғасын тауып, аудан тұрғындарын ортақ іске белсенді қатысуға шақыру жұмыстары тұрақты түрде жүргізілмек.
