Бүгін аудан әкімі Берік Сәрменбаев әлеуметтік маңызы бар нысандардың жай-күйімен танысып, олардың санитарлық тазалығы мен алдағы жылыту маусымына дайындығын назарға алды. Аудандық мәслихат депутаты Ержан Әжікеновпен бірге өткен аралау барысында аудандық аурухана мен аудандық санитариялық-эпидемиологиялық бақылау басқармасының қызметі жан-жақты қаралды.
Аудан басшысы ең алдымен мекеме аумақтарының санитарлық жағдайына ерекше мән берді. Ғимараттардың тазалығы, іргелес аумақтардың күтімі, қоқыс шығару мен тазалық жұмыстарының жүйелі ұйымдастырылуы тексерілді. Аудан әкімі бұл бағыттағы жұмыстардың тұрақты әрі сапалы жүргізілуі тұрғындардың денсаулығына тікелей әсер ететінін атап өтті. Сонымен қатар, қоршаған ортаны күтіп-ұстау мәдениетін қалыптастыру – барлық мекемелер үшін ортақ міндет екеніне тоқталды.
Көркейту-көгалдандыру жұмыстары да назардан тыс қалмады. Жасыл желектерді көбейту, гүлзарлар отырғызу, аумақты абаттандыру шараларының барысы талқыланды. Әсіресе, медициналық мекемелердің айналасының таза әрі жайлы болуы келушілер үшін қолайлы орта қалыптастырудың маңызды бөлігі екені айтылды.
Б.Сарменбаев сапар барысында жылу қазандықтарының жай-күйін де жіті қарап шықты. Қазандықтардың техникалық жағдайы, жабдықтардың талапқа сай жұмыс істеуі, қауіпсіздік шараларының сақталуы және алдағы қысқы маусымға дайындық деңгейі жан-жақты сараланды. Жауапты мамандарға жылу жүйелерінің үздіксіз әрі сенімді жұмысын қамтамасыз ету бойынша нақты міндеттер жүктелді.
Кездесу қорытындысында денсаулық сақтау нысандарының тұрғындар үшін қолжетімді, қауіпсіз және барлық санитарлық талаптарға сай болуы басты назарда болуы тиіс екенін атап өтті. Осыған байланысты мекеме басшыларына санитарлық тазалықты сақтау, аумақтарды күтіп-ұстау және көркейту жұмыстарын тұрақты түрде жүргізу жөнінде нақты тапсырмалар берілді. Сондай-ақ, алдағы жылыту маусымына дайындықты күшейтіп, барлық жүйелердің дайындығын уақытылы қамтамасыз ету қажеттігі ескертілді.
