Сырдария ауданында жайылым аумақтарына жақын орналасқан автомобиль жолдарында ауыл шаруашылығы жануарларының ретсіз қозғалысына жол бермеу және жол қауіпсіздігін қамтамасыз ету мақсатында түсіндірме жұмыстары жүргізілді.
Аталған шара аясында ауыл шаруашылығы жануарларының иелеріне малдың қараусыз қалуы немесе жолға шығуы салдарынан болуы мүмкін жол-көлік оқиғаларының алдын алу мәселелері жан-жақты түсіндірілді. Мамандардың айтуынша, мұндай жағдайлар тек жол қозғалысына қауіп төндіріп қана қоймай, мал иелеріне де материалдық шығын әкелуі мүмкін.
Кездесу барысында тұрғындарға жайылым мен автомобиль жолдарының шекарасын нақты сақтау, малды арнайы бағымда ұстау, сондай-ақ мал жаю кезінде жауапкершілікті күшейту қажеттігі атап өтілді. Сонымен қатар, ауыл шаруашылығы жануарларын белгіленбеген жерлерде еркін жібермеу, жол бойында бақылаусыз қалдырмау жөнінде нақты ұсыныстар берілді.
Мамандар жол қауіпсіздігін қамтамасыз ету – ортақ міндет екенін айтып, тұрғындарды сақтық шараларын қатаң сақтауға шақырды. Түсіндірме жұмыстары барысында тұрғындардың сұрақтарына жауап беріліп, құқықтық және қауіпсіздік талаптары бойынша қосымша ақпараттар ұсынылды.
Мұндай алдын алу шаралары алдағы уақытта да тұрақты түрде жалғасып, ауылдық елді мекендердегі жол қауіпсіздігін арттыруға бағытталмақ.
