Сырдария аудандық балалар кітапханасында жас оқырмандардың рухани танымын кеңейтуге бағытталған тағылымды әдеби кеш ұйымдастырылды. Аталған шара «Өлке болып оқимыз» жобасы аясында қазақтың көрнекті ақыны, сыншы, аудармашы Сейфолла Оспанның өмірі мен шығармашылығына арналды. «Сиқырлы қалам иесі» атты бір ақын сағаты жас буынға ақын мұрасын кеңінен таныстыруды мақсат етті.
Іс-шараның негізгі мақсаты – жас оқырмандарды ақын шығармаларымен таныстыру, поэзияға деген сүйіспеншілігін арттыру және рухани-адамгершілік құндылықтарды насихаттау.
Кеш барысында кітапхана қызметкерлері Сейфолла Оспанның өмір жолына тоқталып, оның шығармашылық ізденістері мен қазақ әдебиетін дамытудағы еңбегін жан-жақты баяндады. Ақын өлеңдерінің тәрбиелік мәні, адамгершілік пен отансүйгіштікке үндейтін мазмұны ерекше атап өтілді.
Шара аясында жас оқырмандар ақынның жырларын мәнерлеп оқып, туған жер, ана, Отан тақырыптарындағы өлеңдерден рухани әсер алды. Поэзия оқулары барысында қатысушылар ақынның тіл өрнегі мен көркемдік ерекшеліктеріне назар аударып, шығармалардың мазмұнына терең бойлауға тырысты.
Сонымен қатар, іс-шара барысында Сейфолла Оспанның шығармашылығына арналған арнайы кітап көрмесі ұйымдастырылып, қатысушыларға ақынның еңбектері мен поэзия әлемі кеңінен таныстырылды. Көрме жас оқырмандардың қызығушылығын оятып, әдебиетке деген ықыласын арттыра түсті.
Жиын соңында оқушылар өз ойларымен бөлісіп, өлеңнің адам жанын тәрбиелеудегі рөлі туралы пікір алмасты. Қатысушылар мұндай рухани кештердің маңыздылығын атап өтіп, ақын шығармашылығына деген қызығушылықтарының артқанын жеткізді.
Тағылымы мол әдеби шара жас оқырмандарға көтеріңкі көңіл күй сыйлап, олардың рухани дүниесін байытуға ықпал етті.
