Шиелі ауданында Сырдария өзені арқылы келетін суды қауіпсіз өткізу мәселелері кеңінен талқыланды. Аудан әкімдігінің мәжіліс залында өткен арнайы жиынға аудан әкімі Айтбай Жандарбеков төрағалық етті.
Кеңеске аудандық мәслихат төрағасы, әкім орынбасарлары, Amanat партиясының аудандық филиалының өкілдері, дербес бөлім басшылары мен кент және ауылдық округ әкімдері қатысты. Ауыл әкімдері жиынға ZOOM платформасы арқылы онлайн қосылды.
Басқосу барысында су тасқыны қаупінің алдын алу, қорғаныс бөгеттерінің қазіргі жай-күйі және төтенше жағдайлардың алдын алу бағытындағы нақты шаралар қаралды. Аудан аумағын оңтүстік-шығыстан солтүстік-батысқа қарай кесіп өтетін Сырдария өзенінің ұзындығы 260 шақырымды құрайды. Ал қорғаныс бөгеттерінің жалпы ұзындығы 71,6 шақырым, оның 63,3 шақырымы оң жағалауда, 8,3 шақырымы сол жағалауда орналасқан.
Мамандардың мәліметінше, өзен бойында орналасқан 5 елді мекен су басу қаупі бар аймаққа кіреді. Бұл аумақтарда 7 462 тұрғын мен 1 370 тұрғын үй бар.
Жиында «Қазсушар» РМК Қызылорда филиалының «Шиелісушар» өндірістік бөлімше басшысы Дихан Әубәкіров өзендегі су деңгейінің қазіргі жағдайы, гидротехникалық нысандардың жұмысы және су өткізу мүмкіндіктері туралы баяндады. Сонымен қатар аудандық төтенше жағдайлар бөлімі өкілдері төтенше жағдайлардың алдын алу және күш-құралдардың дайындығы жөнінде ақпарат берді.
Кеңес қорытындысында аудан әкімі жауапты мекемелерге нақты тапсырмалар жүктеп, қорғаныс бөгеттерін нығайту, қауіпті учаскелерде тәулік бойы кезекшілік ұйымдастыру және қажетті техника мен материалдық қорды толық дайындықта ұстау жұмыстарын жүйелі түрде жүргізуді тапсырды.
