Шиелі ауданында жасөспірімдер арасындағы құқықбұзушылықтың алдын алу және құқықтық сауаттылықты арттыру бағытында кезекті маңызды іс-шара өтті. “Заң және Тәртіп” қағидаты аясында ұйымдастырылған бұл кездесу №244 Ы. Жақаев атындағы қазақ орта мектебі базасында жоғары сынып оқушыларының қатысуымен өтті.
Аталған жиынға Шиелі ауданы полиция бөлімінің қоғамдық қауіпсіздік бөлімшесіне қарасты отбасылық-тұрмыстық зорлық-зомбылыққа қарсы күрес тобының аға инспекторы, полиция майоры Ж. Сейтжан және криминалдық полиция бөлімшесінің аға жедел уәкілі, полиция капитаны Н. Дербісалин қатысып, оқушылармен ашық форматта кездесу өткізді.
Жиын барысында құқық қорғау органдарының өкілдері жасөспірімдер арасында жиі кездесетін құқықбұзушылық түрлеріне тоқталып, олардың салдары туралы кеңінен түсіндірді. Әсіресе, топтық төбелестердің алдын алу, әлімжеттікке жол бермеу, ұсақ бұзақылық, ұрлық және вандализм секілді құқықбұзушылықтардың қоғамға тигізер зияны нақты мысалдар арқылы баяндалды.
Сонымен қатар, қазіргі таңда кең таралған интернет алаяқтық мәселесі де назардан тыс қалмады. Мамандар оқушыларға әлеуметтік желілерде сақ болу, жеке мәліметтерді қорғау және күмәнді сілтемелерден аулақ болу қажеттігін ескертті. Бұдан бөлек, сталкинг, буллинг және кибербуллинг секілді заманауи қауіптердің мәні түсіндіріліп, олардың психологиялық және құқықтық салдары айтылды.
Кездесу барысында жасөспірімдердің бос уақытын тиімді ұйымдастыру, түнгі уақытта себепсіз көшеде жүрмеу, ойынханаларға бармау, қоғамдық орындарда тәртіп сақтау мәселелері де кеңінен қозғалды. Полиция қызметкерлері заң талаптарын сақтау – әрбір азаматтың міндеті екенін атап өтіп, құқықбұзушылықтың алдын алу ең алдымен тәртіп пен жауапкершіліктен басталатынын жеткізді.
Іс-шара аясында оқушыларға арнайы дайындалған бейнероликтер көрсетіліп, құқықтық тақырыптағы жадынамалар таратылды. Бұл көрнекі материалдар жастардың ақпаратты тереңірек түсінуіне мүмкіндік берді.
Жиын соңында оқушылар өздерін толғандырған сұрақтарын қойып, полиция қызметкерлерінен нақты жауаптар алды. Ашық диалог форматында өткен кездесу жастардың құқықтық мәдениетін арттыруға және қауіпсіз қоғам қалыптастыруға бағытталған маңызды қадам болды.
Мамандар мұндай профилактикалық кездесулер алдағы уақытта да жалғасатынын атап өтіп, жас буынды заңға құрметпен қарап, саналы өмір салтын ұстануға шақырды.
