Шиелі ауданында Халықаралық мейіргерлер күніне арналған салтанатты шара өтіп, денсаулық сақтау саласында абыройлы еңбек етіп жүрген ақ халатты абзал жандарға құрмет көрсетілді. Адам өмірі мен денсаулығын сақтауда өлшеусіз еңбек етіп жүрген мейіргерлер қауымының кәсіби мерекесіне арналған тағылымды кеш Бұдабай Қабылұлы атындағы аудандық мәдениет үйінде ұйымдастырылды.
Мерекелік шараға аудан әкімінің орынбасары Болатбек Ысмағұлов қатысып, медицина саласы қызметкерлерін кәсіби мерекелерімен құттықтады. Өз сөзінде ол мейіргер мамандығының қоғамдағы маңызы ерекше екенін атап өтіп, олардың адам өміріне араша болудағы қажырлы еңбегіне жоғары баға берді.
– «Сіздерді кәсіби мерекелеріңіз – Халықаралық мейіргерлер күнімен шын жүректен құттықтаймын! Медицина – адам өміріне тікелей араша болатын аса жауапты әрі қастерлі сала. Ал осы саланың алдыңғы шебінде еңбек етіп жүрген мейіргерлер қауымы мейірім мен жанашырлықтың, төзім мен жауапкершіліктің жарқын үлгісі.
Ауырған жанның жанарындағы үмітті, ананың алғысын, баланың күлкісін көру – сіздердің ерен еңбектеріңіздің шынайы жемісі. Сіздер күн демей, түн демей ел саулығы жолында аянбай қызмет етіп келесіздер. Жылы сөздеріңіз бен жанашырлыққа толы қамқорлықтарыңыз науқас жандарға үлкен демеу. Сіздердің адам өмірін сақтаудағы қажырлы қызметтеріңізге шынайы алғыс білдіреміз. Еңбектеріңіз әрдайым еленіп, мерейлеріңіз үстем болсын!» – деді аудан әкімінің орынбасары.
Шара барысында елімізде денсаулық сақтау саласын дамыту бағытында атқарылып жатқан жұмыстар да кеңінен айтылды. Мемлекет басшысы Қасым-Жомарт Тоқаев қолдауымен жүзеге асырылып жатқан жүйелі реформалардың нәтижесінде Шиелі ауданында да ауқымды медициналық жобалар қолға алынғаны атап өтілді.
Соңғы жылдары аудан тұрғындарының сапалы медициналық қызметке қолжетімділігін арттыру мақсатында бірқатар маңызды нысандар ел игілігіне берілді. Атап айтқанда, Талаптан, Ақтоған, Қарғалы, Ортақшыл, Алмалы, Телікөл, Тартоғай және Бестам ауылдық округтерінде жаңа дәрігерлік амбулаториялар салынып, халыққа қызмет көрсетуде. Бұл ауыл тұрғындарының медициналық көмекке қолжетімділігін арттыруға мүмкіндік беріп отыр.
Сонымен қатар, 255 миллион теңге қаржыға күрделі жөндеуден өткен «Болашақ» дәрігерлік амбулаториясы толық жаңғыртылып, заманауи талаптарға сай қайта пайдалануға берілді. Бұдан бөлек, мемлекетке қайтарылған активтер есебінен құны 2 миллиард 323 миллион теңгені құрайтын 30 төсектік жұқпалы аурулар бөлімшесі салынып, аудан тұрғындарының игілігіне қызмет етуде.
Аудандық аурухана жанынан қосымша ғимарат салынып, оның ішіне құны 650 миллион теңге болатын заманауи магниттік-резонанстық томография аппараты орнатылды. Жалпы құны 733 миллион теңгені құрайтын бұл жоба тұрғындардың сапалы әрі қолжетімді диагностикадан өтуіне зор мүмкіндік жасап отыр.
Медицина саласын материалдық-техникалық жағынан нығайту бағытындағы жұмыстар да жүйелі жалғасуда. Соңғы жылдары ауданға 27 жедел жәрдем көлігі сатып алынып, ел игілігіне табысталды. Сонымен қатар, Гежуба Шиелі Цемент компаниясының демеушілігімен екі жыл қатарынан аудандық ауруханаға жаңа жедел жәрдем көліктері сыйға берілді.
Мерекелік кеш барысында ауданның денсаулық сақтау саласының дамуына елеулі үлес қосып жүрген бірқатар мейіргерлер аудан әкімінің «Алғыс хатымен» марапатталды. Бұл олардың ел саулығы жолындағы адал еңбегіне көрсетілген құрметтің айқын көрінісі болды.
Кеш соңында аудан өнерпаздары медицина қызметкерлеріне арнап арнайы концерттік бағдарлама ұсынып, мерекелік шараның сәнін келтірді. Әсем ән мен көтеріңкі көңіл-күйге толы тағылымды кеш ақ халатты абзал жандарға деген шынайы құрмет пен ыстық ықыластың жарқын үлгісіне айналды.
