Сырдария ауданында жасөспірімдер арасында құқықбұзушылықтың алдын алу және салауатты өмір салтын насихаттау бағытында кезекті профилактикалық іс-шара өтті. №35 мектеп-лицейі базасында ұйымдастырылған кездесуге аудандық полиция бөлімінің қызметкерлері қатысып, оқушылармен ашық форматта пікір алмасты.
Іс-шараға Сырдария ауданы полиция бөлімі қоғамдық қауіпсіздік бөлімшесінің ювеналды полиция тобының учаскелік инспекторы, полиция капитаны Г.Жұмабек, полиция аға лейтенанты Ж.Талғатқызы, сондай-ақ криминалдық полиция бөлімшесінің жедел уәкілдері – полиция аға лейтенанты А.Салман мен Ә.Саруаров қатысты.
«Нашақорлыққа жол жоқ» тақырыбында өткен кездесуде тәртіп сақшылары жастарға есірткінің зияны мен оның адам денсаулығына, психикасына және болашағына тигізетін кері әсері туралы жан-жақты түсіндірді. Мамандар нашақорлықтың тек жеке адамның емес, тұтас қоғамның қауіпсіздігіне қатер төндіретінін атап өтті.
Сонымен қатар, жиын барысында оқушыларға қазіргі қоғамда кең таралған интернет-алаяқтық түрлері туралы нақты мысалдар келтіріліп, одан сақтану жолдары түсіндірілді. Полицейлер күмәнді қоңыраулар мен хабарламаларға сенбеу, жеке мәліметтерді бөгде адамдарға жарияламау және қауіпсіздік ережелерін сақтау қажеттігін ескертті.
Кездесуде жасөспірімдер арасындағы өзекті мәселелердің бірі – топтық төбелес пен буллинг тақырыбы да кеңінен қозғалды. Құқық қорғау органдарының өкілдері мұндай әрекеттердің құқықтық салдары бар екенін түсіндіріп, әрбір құқықбұзушылық үшін заң аясында жауапкершілік қарастырылатынын жеткізді. Сондай-ақ, оқушыларға өзара сыйластықты сақтау, тәртіпке бағыну және заң талаптарын орындау – қауіпсіз қоғамның негізгі кепілі екені айтылды.
Мамандардың айтуынша, мұндай профилактикалық кездесулер жасөспірімдердің құқықтық сауаттылығын арттырып қана қоймай, олардың саналы әрі жауапты азамат болып қалыптасуына ықпал етеді. Іс-шара барысында оқушылар өздерін толғандырған сұрақтарын қойып, мамандардан нақты жауап алды.
Ұйымдастырушылардың пікірінше, жастармен тұрақты түрде жүргізілетін осындай түсіндіру жұмыстары құқықбұзушылықтың алдын алып, қоғамдағы қауіпсіздік мәдениетін нығайтуға бағытталған маңызды қадам болып табылады.
