Қасым-Жомарт Тоқаев бастамасымен қолға алынған «Таза Қазақстан» республикалық экологиялық акциясы аясында Шиелі ауданында бүгін қарқын алған ауқымды сенбілік жұмыстарымен айшықталды. Ауданның экологиялық ахуалын жақсартуға бағытталған бұл шара тұрғындардың белсенділігін көрсетіп қана қоймай, қоғамдағы ортақ жауапкершіліктің арта түскенін аңғартты.
Таңғы уақыттан басталған тазалық жұмыстарына аудан орталығы мен барлық ауылдық округтердің тұрғындары түгелге жуық жұмылдырылды. Қоғамдық орындар мен көшелерді тазалауға мемлекеттік мекеме қызметкерлері, білім беру және денсаулық сақтау саласының мамандары, жастар ұйымдары мен еріктілер бір кісідей атсалысты. Нәтижесінде ұзақ уақыттан бері қордаланған қоқыстар шығарылып, саябақтар мен әлеуметтік нысандар маңы ретке келтірілді.
Аудан аумағында тазалық жұмыстарын үйлестіруде жергілікті биліктің ұстанымы айқын байқалады. Аудан әкімі Айтбай Жандарбеков экологиялық мәселелерді күн тәртібінен түсірмей, санитарлық тазалық пен абаттандыру жұмыстарын жүйелі жүргізуді басты міндеттердің бірі ретінде белгілеген. Соның нәтижесінде аудан көгалдандыру жұмыстары да қатар жүргізіліп келеді. Бүгінгі сенбілік барысында жүздеген ағаш көшеттері отырғызылып, жасыл желек қорын көбейтуге басымдық берілді.
Жалпы, мұндай ауқымды шаралар тек бір күндік тазалықпен шектелмейді. Сарапшылардың пікірінше, экологиялық акциялар халықтың табиғатқа деген көзқарасын өзгертіп, ұзақ мерзімді оң нәтижелерге жол ашады. Тұрғындардың өз ауласынан бастап қоғамдық кеңістікке дейінгі тазалыққа бейжай қарамауы – қоршаған ортаны сақтаудың маңызды алғышарты.
Айта кету керек, «Таза Қазақстан» акциясы аясындағы жұмыстар алдағы уақытта да жалғасын табады. Жергілікті билік өкілдері тұрғындарды ортақ іске белсенді қатысуға шақырып, экологиялық мәдениетті қалыптастыру бағытындағы ақпараттық-түсіндіру жұмыстарын күшейтуді көздеп отыр. Бұл бастамалар Шиелінің көркеюіне, санитарлық жағдайының жақсаруына және тұрғындардың өмір сапасының артуына өз үлесін қоспақ.
