Шиелі ауданында 4–6 мамыр аралығында «Таза қоғам – таза аймақ» атты жедел-профилактикалық іс-шарасы өтуде. Бұл бастама Мемлекет басшысы Қасым-Жомарт Тоқаев тапсырмасына сәйкес ел көлемінде жүзеге асырылып жатқан Таза Қазақстан республикалық экологиялық акциясы аясында ұйымдастырылып отыр.
Аталған шараның басты мақсаты – аудан аумағында санитарлық тазалықты қамтамасыз ету, рұқсатсыз қоқыс тастау орындарының пайда болуына тосқауыл қою және экологиялық заңнама талаптарының сақталуын күшейту. Сонымен қатар, құқық бұзушылықтардың алдын алу, қоғамдық тәртіпті сақтау және тұрғындардың экологиялық мәдениетін арттыру да іс-шараның негізгі бағыттарының бірі саналады.
Үш күнге жоспарланған профилактикалық жұмыстар барысында тиісті сала мамандары мен құқық қорғау органдары бірлесіп рейдтік іс-шаралар жүргізеді. Олар елді мекендер мен жол бойларын, қоғамдық орындарды тексеріп, белгіленбеген жерлерге қоқыс тастаған азаматтарды анықтайды. Заң талаптарын бұзған тұлғаларға қатысты әкімшілік шаралар қолданылып, түсіндіру жұмыстары қатар жүргізіледі.
Мамандардың айтуынша, мұндай кешенді шаралар тек құқық бұзушылықтарды анықтаумен шектелмейді. Оның басты мақсаты – қоғамда тазалыққа деген жауапкершілікті қалыптастыру. Өйткені қоршаған ортаның тазалығы – әрбір азаматтың күнделікті іс-әрекетіне тікелей байланысты.
Жергілікті билік өкілдері аудан тұрғындарын аталған акцияға белсенді қатысуға шақырады. Табиғатты қорғау, туған жердің тазалығын сақтау – баршаға ортақ міндет екені ерекше атап өтілуде.
