Шиелі ауданындағы білім беру саласында тағылымы мол, мазмұны терең маңызды шара ұйымдастырылды. Аудандық білім бөлімінің №207 «Жаңатұрмыс» орта мектебінде «Ұлттық құндылықтарды жаңғырту және заманауи білім беру» тақырыбында ауқымды семинар өтіп, оған аудан мектептерінің педагогтері мен сала мамандары қатысты.
Семинардың ашылу сәті ерекше ықыласпен ұйымдастырылды. Қонақтарды қарсы алып, тіркеу рәсімінен кейін қатысушылар «Қолөнер керуені» және «SMART BALA» көрмелерін тамашалады. Бұл көрмелерде ұлттық мұра мен қазіргі білім беру үрдісінің үйлесімді байланысы айқын көрініс тапты. Қолөнер бұйымдары арқылы ата-бабадан жеткен мәдени құндылықтар дәріптелсе, заманауи жобалар оқушылардың инновациялық ойлау қабілетін паш етті.
Бағдарлама аясында ұйымдастырылған тренингтер де қатысушылардың көңілінен шықты. Күй әуенімен сүйемелденген психологиялық жаттығулар ерекше атмосфера қалыптастырып, ұстаздарға серпін мен шабыт сыйлады. Бұл бөлім семинардың мазмұнын байытып қана қоймай, қатысушылар арасындағы еркін қарым-қатынасты нығайтты.
Ашық сабақтар барысында әр пәннің өзіндік ерекшелігі мен тәрбиелік мәні кеңінен ашылды. Бастауыш сыныптарда оқушыларға табиғатты аялау идеясы насихатталса, тарих пәнінде елге деген құрмет пен отансүйгіштік тақырыптары қозғалды. Ал отбасы құндылықтарына арналған сайыста ата-ана мен бала арасындағы байланыс, өзара түсіністік пен сыйластық көрініс тапты.
Семинардың келесі кезеңінде қатысушылар интеллектуалды ойындар мен пікірталас алаңдарына қатысып, ұлттық құндылықтардың бүгінгі қоғамдағы рөлі туралы ой бөлісті. Әсіресе, ата-әжелермен ұйымдастырылған кездесу көпшілікке терең әсер қалдырды. Ұрпақтар сабақтастығы, тәлім-тәрбие мәселелері кеңінен қозғалып, жастарға бағыт-бағдар беретін тағылымды әңгімелер айтылды.
Сонымен қатар, «Телефон тұтқыны» атты сахналық қойылым қазіргі қоғамдағы өзекті мәселелердің бірін – жастардың гаджетке тәуелділігін көркем түрде жеткізіп, көрермендерді ойландырды. Ал концерттік бағдарлама семинарға ерекше сән беріп, қатысушыларға көтеріңкі көңіл күй сыйлады.
Іс-шара соңында ұстаздар өзара пікір алмасып, тәжірибе бөлісті. Семинар барысында ұсынылған тың идеялар мен әдістемелік тәсілдер білім беру үдерісін жетілдіруге ықпал ететіні атап өтілді.
Жалпы, бұл семинар ұлттық тәрбиені жаңғырта отырып, оны заманауи білім беру жүйесімен ұштастырудың маңыздылығын айқындады. Осындай мазмұнды кездесулер өскелең ұрпаққа сапалы білім мен саналы тәрбие беруде маңызды рөл атқаратыны сөзсіз.
