Аудан әкімі Берік Сәрменбаевтың төрағалығымен өткен кезекті мәжілісте қоғамның өзекті бағыттарының бірі — инклюзивті саясатты іске асыру мәселелері жан-жақты қаралды. Жиынға тиісті бөлімдер мен мекемелердің басшылары, сондай-ақ сала мамандары қатысып, атқарылып жатқан жұмыстар мен алдағы міндеттерді саралады.
Мәжілісті ашқан аудан басшысы бұл бағыттың тек әлеуметтік салаға ғана емес, жалпы қоғамның дамуына тікелей әсер ететінін атап өтті. Оның айтуынша, инклюзивті саясат – қоғамдағы әрбір азаматқа тең мүмкіндік беруді көздейтін кешенді ұстаным. Әсіресе, мүгедектігі бар жандардың өмір сапасын арттыру, олардың қоғамдық ортаға бейімделуіне жағдай жасау — мемлекеттік саясаттың басым бағыттарының бірі.
— Инклюзивті саясатты жүзеге асыру — бұл тек жекелеген шаралармен шектелмейді. Бұл — қоғамның барлық саласын қамтитын жүйелі жұмыс. Әрбір мүгедектігі бар азамат өзін қоғамның толыққанды мүшесі ретінде сезінуі тиіс. Сол үшін қажетті барлық жағдайды жасау — біздің ортақ міндетіміз, — деді Берік Әбдіғаппарұлы.
Жиында келтірілген мәліметтерге сүйенсек, қазіргі таңда ауданда мүгедектігі бар 1454 азамат тіркелген. Оның ішінде 60-ы — 18 жасқа дейінгі балалар. Бұл көрсеткіштер аталған бағыттағы жұмыстың ауқымды әрі жауапты екенін көрсетеді.
Аудан көлемінде ерекше қажеттілігі бар азаматтарды әлеуметтік оңалту, оларды инклюзивті біліммен қамту, тұрғын үй жағдайларын жақсарту, мәдени және спорттық іс-шараларға тарту бағытында нақты жұмыстар жүргізілуде. Сонымен қатар, кедергісіз орта қалыптастыру мәселесіне ерекше көңіл бөлінген.
Биыл аудан бойынша 7 нысанды бейімдеу жоспарланған. Бүгінгі таңда олардың 5-еуі толық дайын болып, қолжетімділіктің интерактивті картасына енгізілген. Қалған екі нысан бойынша жұмыстар жалғасып жатыр және оларды екінші тоқсанда аяқтау көзделген.
Әлеуметтік қолдау шаралары да назардан тыс қалмаған. Атап айтқанда, мүгедектігі бар 95 баланы үйде оқыту шығындарын өтеу үшін 9 млн 407 мың теңге қаржы бөлінген. Жылдың алғашқы тоқсанында 71 баланың ата-анасына тиісті төлемдер тағайындалған.
Сонымен қатар, жеке оңалту бағдарламалары аясында түскен 820 өтініштің 629-ы орындалып, нақты көмек көрсетілген. Бұл — атқарылған жұмыстың нақты нәтижесін айқындайтын көрсеткіш.
Жиын барысында жауапты сала басшылары өз бағыттары бойынша есеп беріп, проблемалық мәселелер мен оларды шешу жолдарын ұсынды. Аудан әкімі өз кезегінде бұл жұмыстардың барлығы тұрақты бақылауда болатынын ескертіп, формалды тәсілге жол берілмеуі керектігін қатаң тапсырды.
Мәжіліс қорытындысында инклюзивті ортаны дамытуға бағытталған бірқатар нақты тапсырмалар жүктелді. Олардың қатарында инфрақұрылымды бейімдеу жұмыстарын жеделдету, әлеуметтік қызметтердің сапасын арттыру, сондай-ақ ерекше қажеттілігі бар азаматтардың қоғамдық өмірге белсенді қатысуын қамтамасыз ету мәселелері бар.
