2026 жылдың 14–17 мамыр аралығында Өскемен қаласында Халықаралық музей күніне орай ұйымдастырылған «Атамұра» халықаралық тоқыма қолөнері фестивалі аясында өткен «Аламан құрақ» республикалық жобасы ұлттық өнерді ұлықтаған тағылымды шараға айналды. Түркі халықтарына ортақ мәдени мұраны насихаттауды мақсат еткен ауқымды фестивальге Қазақстанмен қатар Өзбекстан, Қырғызстан, Моңғолия, Әзірбайжан және өзге де мемлекеттерден келген қолөнер шеберлері қатысты.
«Ғасырлық дәстүр» тақырыбын арқау еткен халықаралық фестиваль барысында ұлттық қолөнердің сан қырлы бағыттары таныстырылып, ата-бабадан жеткен асыл мұраның қадір-қасиеті кеңінен дәріптелді. Сегіз мемлекеттен жиналған ісмерлер өздерінің төл өнерін көпшілікке ұсынып, ғасырлар бойы жалғасып келе жатқан дәстүр сабақтастығының маңызын айшықтады. Көрмелер мен шеберлік сағаттарында ұлттық нақыштағы бұйымдар таныстырылып, көрермендер қазақтың бай қолөнер мәдениетімен тереңірек танысуға мүмкіндік алды.
Осындай халықаралық деңгейдегі рухани-мәдени шарада Сырдария ауданының мерейі үстем болды. Атап айтқанда, ауданымызға қарасты Айдарлы ауылының қолөнер шебері Марияш Бахадүрова «Үздік сырмақшы» номинациясының иегері атанып, ұлттық өнердің мәртебесін асқақтатты.
Бұл жетістік – ұзақ жылғы еңбектің, табандылықтың және ұлттық өнерге деген шынайы сүйіспеншіліктің нәтижесі. Марияш апайдың қолынан шыққан әрбір сырмақ – халқымыздың рухани болмысын, ұлттық дүниетанымын айшықтайтын ерекше туынды. Шебердің ою-өрнекке бай сырмақтары қазақ халқының тұрмыс-тіршілігі мен мәдениетінің терең тарихынан сыр шертеді.
Сырмақ сыру өнері – халқымыздың көнеден келе жатқан қасиетті мұраларының бірі. Ұлттық қолөнердің бұл түрінде қазақтың салт-дәстүрі, таным-түсінігі мен эстетикалық талғамы көрініс табады. Әрбір оюдың өзіндік мағынасы бар. Шеберлер киіз бен түрлі түсті оюларды үйлестіре отырып, тек тұрмыстық бұйым жасап қана қоймай, ұлттың рухани құндылықтарын ұрпақ санасына сіңіріп келеді.
Марияш Бахадүрова көп жылдан бері ұлттық қолөнерді дамытуға үлес қосып, жастарға тәлім беріп келе жатқан тәжірибелі ісмерлердің бірі. Ол атадан балаға мирас болған өнерді дәріптеп, қазақы нақыштағы бұйымдарды жаңғырту бағытында аянбай еңбек етіп келеді. Халықаралық фестивальде иеленген марапаты – оның шығармашылық ізденісі мен кәсіби шеберлігінің айқын дәлелі.
Фестиваль аясында қатысушылар арасында тәжірибе алмасу алаңдары ұйымдастырылып, ұлттық өнердің бүгінгі даму бағыты мен болашағы талқыланды. Қолөнер шеберлері түркі халықтарына ортақ мәдени құндылықтардың маңызын атап өтіп, мұндай тағылымды жобалардың ұлттық мұраны сақтаудағы рөлі ерекше екенін жеткізді.
Халықаралық өнер алаңында ел намысын абыроймен қорғап, Сыр өңірінің мерейін асырған Марияш Бахадүрова апайымыздың жетістігі – барша аудан тұрғындары үшін зор мақтаныш.
