Аудан әкімі Берік Сәрменбаев қатысуымен аудандық мәслихаттың кезекті 49-сессиясы өтті. Маңызды жиынға аудандық мәслихат депутаттары, әкімнің орынбасарлары, кент және ауылдық округ әкімдері, сондай-ақ дербес бөлім басшылары қатысып, өңірдің әлеуметтік-экономикалық дамуына қатысты өзекті мәселелерді жан-жақты талқылады.
Сессия жұмысы ауқымды әрі мазмұнды күн тәртібімен ерекшеленді. Алдымен 2025 жылға арналған аудандық бюджеттің атқарылуы туралы есеп қаралды. Бұл мәселе бойынша «Сырдария аудандық экономика және қаржы бөлімі» коммуналдық мемлекеттік мекемесінің басшысы Е. Ахетов баяндама жасап, бюджеттің кіріс көздерінің орындалуы, шығыстардың игерілу деңгейі және негізгі қаржылық көрсеткіштер бойынша атқарылған жұмыстарға тоқталды. Баяндамашы бюджет қаражатының тиімді жұмсалуына басымдық берілгенін атап өтті.
Келесі кезекте аудан аумағында ауыл шаруашылығы жануарлары арасында жұқпалы аурулардың алдын алу мәселесі көтерілді. Ветеринариялық-санитариялық қауіпсіздікті қамтамасыз ету бағытындағы жұмыстар туралы Н. Дәулетбаев баяндап, профилактикалық шаралардың орындалуы, вакцинациялау науқаны және бақылау тетіктері туралы кеңінен мәлімет берді. Бұл бағыттағы жұмыстардың тұрақты бақылауда екені айтылды.
Сессияда әлеуметтік қолдау шараларын жетілдіру мәселесі де назардан тыс қалмады. Атап айтқанда, «Әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы» 2023 жылғы 4 қыркүйектегі №54 шешіміне өзгерістер енгізу мәселесі қаралды. Бұл жөнінде «Сырдария аудандық жұмыспен қамту және әлеуметтік бағдарламалар бөлімі» КММ сектор меңгерушісі А. Мұқан баяндама жасап, ұсынылып отырған өзгерістердің мәні мен маңызын түсіндірді.
Сонымен қатар, мәслихаттың 2026 жылдың екінші жартыжылдығына арналған жұмыс жоспары талқыланды. Аудандық мәслихат аппаратының басшысы Г. Божан жоспардың негізгі бағыттары мен басымдықтарын таныстырып, алдағы кезеңдегі атқарылатын жұмыстардың жүйесін айқындады.
Жиында қаралған тағы бір маңызды мәселе – аудан әкімдігі жанынан кәмелетке толмағандардың істері және олардың құқықтарын қорғау жөніндегі комиссия құру болды. Бұл туралы аудан әкімінің орынбасары Д. Байдушев хабарлама жасап, комиссияның негізгі міндеттері мен жұмыс бағыттарын баяндады.
Сондай-ақ, Қызылорда облысы бойынша тексеру комиссиясының 2025 жылға арналған аудандық бюджеттің атқарылуы туралы есебі таныстырылды. Бұл есепті облыстық тексеру комиссиясының мүшесі С. Қармыс баяндап, қаржылық тәртіп пен бюджет қаражатының игерілуіне жүргізілген бақылау нәтижелерін ортаға салды.
Сессия барысында депутаттар көтерілген мәселелер бойынша өз ұсыныстары мен пікірлерін білдіріп, нақты сұрақтар қойды. Талқылау қорытындысы бойынша күн тәртібіндегі барлық мәселелерге қатысты тиісті шешімдер қабылданып, алдағы кезеңге нақты міндеттер айқындалды.
