Сырдария ауданының мәдениет саласында тағы бір жағымды жаңалық тіркелді. Аманкелді ауылдық мәдениет үйінің ұйымдастыруымен өткен композитор Сәбит Ұлықпанұлының шығармашылығын насихаттауға арналған “Сырдың сырбаз сазгері” атты облыстық әншілер конкурсында аудан намысын қорғаған жас өнерпаз Байділдаев Абылайхан жүлделі ІІІ орынды иеленді.
Аталған байқау өңірдегі талантты әншілердің басын қосып, ұлттық өнер мен қазақ ән өнерін дәріптеуге бағытталды. Конкурс барысында қатысушылар композитор Сәбит Ұлықпанұлының әндерін орындап, өздерінің вокалдық шеберлігі мен сахна мәдениетін көпшілік назарына ұсынды.
Аудандық мәдениет үйінің атынан қатысқан Байділдаев Абылайхан көрермендер мен қазылар алқасының жоғары бағасына ие болып, ерекше орындаушылық қабілетімен көзге түсті. Оның сахнадағы еркіндігі, әнді нақышына келтіре орындауы және шығарманың мазмұнын тыңдарманға әсерлі жеткізе білуі нәтижесінде жүлделі ІІІ орынға лайық деп танылды.
Өнер додасы жас таланттардың шығармашылық әлеуетін арттырып қана қоймай, ұлттық мәдениетті насихаттауға да үлкен мүмкіндік берді. Сонымен қатар, мұндай байқаулар жастардың өнерге деген қызығушылығын оятып, олардың кәсіби тұрғыда шыңдалуына жол ашады.
Аудан жұртшылығы мен мәдениет саласының өкілдері жас өнерпазды жетістігімен құттықтап, алдағы уақытта да биік белестерді бағындыруына тілектестік білдіруде.
