Тереңөзек кентінде жастар арасында есірткі құралдарының заңсыз айналымының алдын алу және қоғамдық тәртіпті сақтау мақсатында кешенді рейдтік іс-шара ұйымдастырылды. Аталған шараға Тереңөзек кенті әкімі аппаратының мамандары, аудандық полиция бөлімінің қызметкерлері және Жастар ресурстық орталығының өкілдері бірлесіп қатысты.
Рейд барысында кент аумағындағы көңіл көтеру орындары, дәмханалар мен жастар көп шоғырланатын нысандар араланып, есірткі құралдарын пайдалану және тарату фактілерін анықтау бойынша бақылау жұмыстары жүргізілді. Сонымен қатар, тұрғындар мен кәсіпкерлерге құқық бұзушылықтың алдын алу бағытында түсіндірме жұмыстары кеңінен ұйымдастырылды.
Шара кезінде жастарға есірткінің адам денсаулығына, психологиялық жағдайына және қоғам өміріне тигізетін зияны жан-жақты түсіндірілді. Құқық қорғау органдарының қызметкерлері есірткі заттарын заңсыз сақтау, пайдалану және таратудың қылмыстық жауапкершілікке әкелетінін ескертіп, заң талаптарын сақтау қажеттігін атап өтті.
Сондай-ақ, көңіл көтеру орындарының иелері мен қызметкерлеріне күмәнді жағдайлар орын алған сәтте дереу құзырлы органдарға хабар беру жөнінде ұсыныстар айтылды. Жастар ресурстық орталығының мамандары салауатты өмір салтын насихаттап, жастарды спортпен айналысуға және қоғамдық белсенділікке шақырды.
Ұйымдастырушылардың айтуынша, мұндай профилактикалық іс-шаралар алдағы уақытта да тұрақты түрде өткізіліп, қоғам тыныштығын сақтау мен жастар арасында зиянды әдеттердің алдын алу бағытындағы жұмыстар жалғасын табады.
