Сырдария ауданының Қалжан ахун ауылында қазақ әдебиеті мен өнерінің көрнекті өкілі, ақын, сазгер, драматург Бәкір Тәжібаевтың туғанына 100 жыл толуына орай тағылымы терең, мазмұны бай әдеби-сазды кеш жоғары деңгейде ұйымдастырылды. Рухани шара ауылдық кітапхана мен мәдениет үйінің бірлескен еңбегінің нәтижесінде жүзеге асып, “Адал адам” мәдени-тәрбие орталығының тұжырымдамасы аясындағы “Әлем BOOK” бұрышында «Ән ғұмырдың иесі» тақырыбымен өтті.
Кештің мазмұндық өзегі – қаламгердің бай шығармашылық мұрасын кеңінен насихаттау болды. Шараның алғашқы бөлімінде ауылдық кітапхананың меңгерушісі Роза Тілеубергенова арнайы жасақталған «Ән тербеткен ақын» атты төрт бөлімнен тұратын мазмұнды кітап көрмесін таныстырып, жиналған көпшілікті ақынның өмір жолы мен шығармашылығымен жан-жақты таныстырды. Көрмеге қойылған туындылар қатарында Бәкір Тәжібаевтың поэзиялық жинақтары, ән мәтіндері, драмалық шығармалары және өміріне қатысты архивтік деректер қамтылып, көрерменнің ерекше қызығушылығын тудырды.
Әдеби кештің шымылдығы әсерлі сахналық прологпен ашылды. Ақынның жастық шағын бейнелейтін көрініс көрерменді бірден өткен дәуірдің рухани атмосферасына жетелеп, шығармашылық әлеміне терең бойлатты. Сонымен қатар, ақынның өмірі мен өнер жолын қамтитын бейнеролик ұсынылып, кештің мазмұнын байыта түсті.
Мерейтойлық шараға арнайы шақырылған құрметті қонақтар – ауыл әкімшілігінің бас маманы Бауыржан Жетпісбайұлы, Сырдария аудандық орталықтандырылған кітапханалар жүйесінің директоры Рүстем Мыңтайұлы және аудандық мәдениет және тілдерді дамыту бөлімінің бас маманы Жеңіс Үсенұлы сөз алып, жүрекжарды лебіздерін білдірді. Олар өз сөздерінде Бәкір Тәжібаевтың ұлттық мәдениет пен әдебиетке қосқан үлесін жоғары бағалап, оның шығармаларының жас ұрпақ тәрбиесіндегі маңыздылығына ерекше тоқталды.
Кеш барысында жергілікті ақын, ұстаз Жұмаділ Самат пен жас қаламгер Сүйіндіков Нұрсұлтан мерейтой иесіне арнау өлеңдерін оқып, көрерменнің ыстық ықыласына бөленді. Сондай-ақ, көркемсөз оқу үйірмесінің мүшелері ақын жырларын ерекше тебіреніспен, шынайы сезіммен жеткізіп, поэзия мен сахналық шеберліктің үйлесімді үлгісін көрсетті.
Әдеби-сазды кештің шарықтау шегі – ақын сөзіне жазылған әндердің орындалуы болды. Ауыл өнерпаздары «Ақ бұлақ», «Асыл арман», «Іңкәрім-ай», «Есіңе ал» әндерін нақышына келтіре орындап, көрерменнің жүрегінен орын тапты. Ән мен жыр үндестігі кештің көркемдік деңгейін арттырып, жиналған қауымға ерекше рухани әсер сыйлады.
Бұл тағылымды шара – ұлттық руханиятты дәріптеудің, әдеби мұраны ұлықтаудың және жас ұрпақты өнер мен мәдениетке баулудың жарқын үлгісі болды. Бәкір Тәжібаевтың ғасырлық мерейтойына арналған бұл кеш – оның шығармашылық мұрасын жаңғыртып, келер ұрпақ санасына сіңіруге бағытталған маңызды қадам ретінде бағаланды.
