Аудандағы маңызды инфрақұрылымдық жобалардың бірі – «Қызылорда – Жалағаш» облыстық маңызы бар автомобиль жолының 47,9 шақырымындағы көпірге жүргізіліп жатқан күрделі жөндеу жұмыстары қарқынды түрде жалғасуда. Аудан әкімі Берік Сәрменбаев облыстық мәслихат депутаты Жұмабек Ембергеновпен бірге нысан басына барып, құрылыс жұмыстарының барысымен танысты.
Қазіргі таңда көпірде құрылыс-монтаж жұмыстары бекітілген жоспарға сәйкес жүргізілуде. Жоба аясында көпірдің негізгі тірек конструкцияларын жаңғырту, жол жабынын күшейту және көлік қозғалысының қауіпсіздігін қамтамасыз ету бағытында кешенді жұмыстар атқарылуда. Мамандардың айтуынша, жөндеу жұмыстары толық аяқталғаннан кейін аталған нысанның техникалық жағдайы едәуір жақсарып, тұрғындар мен жолаушылар үшін қауіпсіз әрі қолайлы қозғалыс мүмкіндігі қамтамасыз етіледі.
Құрылыс-монтаж жұмыстарын мердігер мекеме – «Сервис НС» жауапкершілігі шектеулі серіктестігі жүргізуде. Ал техникалық қадағалауды «Ақмешіт Элит Строй» ЖШС жүзеге асыруда. Жобаға сәйкес құрылыс жұмыстарының жалпы ұзақтығы 6 айды құрайды.
Нысан басындағы жұмыс барысын бақылаған аудан әкімі Берік Сәрменбаев жауапты мекеме өкілдеріне құрылыс сапасын тұрақты бақылауда ұстап, барлық жұмыстарды белгіленген мерзімде әрі сапалы аяқтауды тапсырды. Сонымен қатар, жөндеу кезеңінде жол қозғалысына кедергі келтірмеу, тұрғындардың қауіпсіздігін сақтау және уақытша қолайсыздықтарды барынша азайту қажеттігін ерекше атап өтті.
Айта кетейік, көлік инфрақұрылымын жаңғырту – аймақтың әлеуметтік-экономикалық дамуына оң әсер ететін маңызды бағыттардың бірі. Жол мен көпір сапасының жақсаруы тұрғындардың қатынасын жеңілдетіп қана қоймай, өңірдегі көлік қатынасының қауіпсіздігі мен тиімділігін арттыруға мүмкіндік береді.
