Аудан әкімі Берік Сәрменбаевтың төрағалығымен маңызды мәжіліс өтіп, онда оқу жылының аяқталуы, мектеп бітіру рәсімдерін жоғары деңгейде ұйымдастыру, балалардың жазғы демалысын қауіпсіз әрі мазмұнды өткізу және санитарлық тазалық мәселелері кеңінен қаралды.
Жиынға аудан әкімінің орынбасарлары, дербес бөлім басшылары, құқық қорғау органдарының өкілдері, білім беру ұйымдарының жетекшілері мен жауапты сала мамандары қатысты.
Мәжілісте аудандық білім бөлімінің басшысы оқу жылының қорытындылары туралы баяндама жасап, биыл аудан бойынша 8149 оқушы оқу жылын аяқтап отырғанын жеткізді. Оның ішінде 584 оқушы мектеп бітіруші түлек саналады. Ал 505 түлек ұлттық бірыңғай тестілеуге қатысуда. Сонымен қатар 53 оқушы «Алтын белгіге», 70 оқушы «Үздік аттестатқа» үміткер ретінде тіркелген.
Аудан әкімі білім саласындағы негізгі науқан — мектеп бітіру іс-шаралары мен ұлттық бірыңғай тестілеуді талапқа сай әрі жоғары деңгейде ұйымдастыру қажеттігін атап өтті. Әсіресе, түлектерге арналған салтанатты кештер барысында қауіпсіздік пен тәртіп мәселесіне баса назар аударылды.
— Мектеп бітіру рәсімдері барынша қарапайым, мазмұнды және қауіпсіз форматта өтуі тиіс. Ең бастысы — заңсыз ақша жинау фактілеріне жол берілмеуі қажет. Мұғалімдер мен мектеп әкімшілігіне сыйлық алу әрекеттері де тоқтатылуы керек, — деді аудан басшысы.
Сондай-ақ аудандық полиция бөлімімен бірлесіп, мектеп бітірушілердің кортеж ұйымдастыруына, жалға алынған көліктермен бей-берекет серуендеуіне және түнгі уақытта бақылаусыз жүруіне жол бермеу тапсырылды. Жауапты сала мамандарына ата-аналармен түсіндіру жұмыстарын күшейту міндеттелді.
Мәжілісте балалардың жазғы демалысын ұйымдастыру мәселесі де кеңінен сөз болды. Аудан басшысы жаз мезгілінде оқушылардың бос уақытын тиімді өткізу, олардың қауіпсіздігін қамтамасыз ету және сауықтыру шараларын сапалы ұйымдастыру маңызды бағыттардың бірі екенін атап өтті.
Осыған байланысты «Жалын» тынығу лагері мен мектеп жанындағы лагерьлердің жаңа маусымға толық дайын болуы, санитарлық талаптардың сақталуы, балалардың қауіпсіздігі мен тамақ сапасының тұрақты бақылауда болуы тапсырылды. Сонымен қатар мәдени-көпшілік, спорттық және танымдық іс-шараларды көбейту арқылы балалардың жазғы демалысын мазмұнды ұйымдастыру қажеттігі айтылды.
Жиында суға шомылу маусымындағы қауіпсіздік мәселесіне де ерекше назар аударылды. Жауапты мекемелерге балаларды тасымалдау кезінде қауіпсіздік талаптарын сақтау, рұқсат етілмеген су айдындарында шомылудың алдын алу және профилактикалық түсіндіру жұмыстарын тұрақты жүргізу жүктелді.
Бұдан бөлек, мәжілісте «Таза Қазақстан» республикалық экологиялық акциясы аясындағы санитарлық тазалық, елді мекендерді абаттандыру және көгалдандыру жұмыстарының барысы талқыланды. Аудан әкімі тазалық жұмыстарын жүйелі жүргізу, қоғамдық орындар мен көшелердің тазалығын сақтау, тұрғындарды экологиялық мәдениетке шақыру бағытындағы жұмыстарды жандандыруды тапсырды.
Жиын қорытындысында жауапты мекемелер мен сала басшыларына нақты міндеттер жүктеліп, барлық бағыттағы жұмыстарды үйлестірілген әрі жүйелі түрде ұйымдастыру қажеттігі қатаң ескертілді.
