«Сырдария – қауіпсіз аудан, болашақ ұрпақ мекені» жобасы аясында 2026 жылғы 14 мамыр күні аудан прокуратурасының бастамасымен пробация есебінде тұрған азаматтардың тұрғылықты мекенжайларын тексеруге бағытталған рейдтік іс-шаралар ұйымдастырылды. Ауқымды профилактикалық шараға аудандық пробация қызметі, аудандық полиция бөлімі, Жастар ресурстық орталығы және аудандық жұмыспен қамту бөлімінің өкілдері жұмылдырылды.
Іс-шараның басты мақсаты – пробациялық бақылаудағы азаматтардың қоғамдық тәртіпті сақтауын қадағалау, сот жүктеген міндеттер мен шектеулердің орындалуын тексеру, құқық бұзушылықтардың алдын алу және олардың қоғамға қайта бейімделуіне қолдау көрсету.
Рейд барысында жауапты сала мамандары пробация есебінде тұрған азаматтардың тұрғылықты мекенжайларын аралап, олардың әлеуметтік-тұрмыстық жағдайларымен танысты. Әрбір азаматпен жеке профилактикалық әңгімелер жүргізіліп, олардың қазіргі өмір сүру деңгейі, отбасылық ахуалы, тұрақты жұмыспен қамтылуы және қоғамға бейімделу барысы жан-жақты сараланды.
Сонымен қатар, аудандық жұмыспен қамту бөлімінің мамандары азаматтарға мемлекеттік бағдарламалар арқылы жұмысқа орналасу мүмкіндіктері жөнінде түсіндірме жұмыстарын жүргізді. Жастар ресурстық орталығы тарапынан түрлі әлеуметтік қолдау тетіктері мен жастарға арналған бағдарламалар туралы ақпараттар берілді.
Рейдтік шара кезінде құқық бұзушылықтардың алдын алу мәселесіне ерекше назар аударылды. Қатысушы мекеме өкілдері пробация талаптарын бұзудың құқықтық салдарын түсіндіріп, қолданыстағы заңнама талаптарын сақтау жөнінде құқықтық кеңестер ұсынды. Сондай-ақ, азаматтарға қоғамнан шет қалмай, салауатты өмір салтын ұстану, тұрақты еңбекпен айналысу және әлеуметтік ортаға белсенді араласу қажеттігі айтылды.
Мамандардың айтуынша, мұндай кешенді профилактикалық шаралар пробация есебіндегі тұлғалардың қайта құқық бұзушылық жасау тәуекелін төмендетуге, олардың өмірге деген көзқарасын оң бағытта өзгертуге және қоғамға толыққанды бейімделуіне ықпал етеді.
Аудан прокуратурасының үйлестіруімен қолға алынған бұл бағыттағы жұмыстар алдағы уақытта да жүйелі түрде жалғасып, қоғамдық қауіпсіздікті қамтамасыз ету мен құқық бұзушылықтардың алдын алуға бағыттала бермек.
