Шиелідегі Бұдабай Қабылұлы атындағы мәдениет үйінде «Заң және тәртіп» қағидаты аясында ұйымдастырылған «Шиелі – қауіпсіз аудан, жарқын болашақтың мекені» және «Саналы ұрпақ» жобалары бойынша ведомствоаралық мәжіліс өтті. Ауқымды жиынға аудан әкімі Айтбай Жандарбеков, аудан прокуроры Мейрамбек Маханбетжанов, аудандық мәслихат төрағасы Мұрат Тұрабаев, құқық қорғау және білім саласының басшылары, дербес бөлім жетекшілері, кент және ауылдық округ әкімдері, мектеп директорлары мен олардың орынбасарлары, сондай-ақ аудан тұрғындары қатысты.
Мәжілістің негізгі мақсаты – аудан көлеміндегі қоғамдық қауіпсіздікті қамтамасыз ету, құқық бұзушылықтың алдын алу, жасөспірімдер арасындағы қылмыстың жолын кесу және тұрғындардың құқықтық сауаттылығын арттыру бағытындағы жұмыстарды саралау болды.
Жиында Мемлекет басшысы Қасым-Жомарт Тоқаевтың елдегі заң үстемдігін нығайту, қоғамда әділеттілік қағидатын қалыптастыру жөніндегі бастамалары кеңінен сөз болды. Президенттің Қазақстан халқына арнаған Жолдауында құқық бұзушылықтардың алдын алу мен қоғамдық тәртіпті күшейту мәселесіне айрықша назар аударылғаны атап өтілді. Осыған сәйкес, Шиелі ауданында құқықтық мәдениетті қалыптастыру, қоғамдық тәртіпті сақтау және жастар тәрбиесіне қатысты кешенді жұмыстар жүйелі түрде жүзеге асырылып келеді.
Мәжілісте алғашқы болып сөз алған аудан прокурорының орынбасары Ғанибек Сағатов аудан көлемінде атқарылып жатқан профилактикалық шараларға тоқталды. Ол әсіресе жасөспірімдер арасындағы құқық бұзушылықтың алдын алу, қоғамдық орындардағы тәртіпті күшейту және салааралық байланысты нығайтудың маңыздылығын атап өтті. Сонымен қатар, құқық қорғау органдары мен білім беру ұйымдарының бірлескен жұмысы нәтижесінде бірқатар оң көрсеткіштерге қол жеткізілгенін жеткізді.
Өз кезегінде аудандық білім бөлімінің басшысы Дауренбек Насибеков білім беру ұйымдарындағы тәрбие жұмыстарының барысы жөнінде баяндама жасады. Ол оқушылар арасында құқықтық сауаттылықты арттыру, буллинг пен әлімжеттіктің алдын алу, ата-аналармен байланысты күшейту және жасөспірімдердің бос уақытын тиімді ұйымдастыру бағытында атқарылып жатқан жұмыстарға тоқталды. Сондай-ақ, мектептерде құқықтық тәрбиеге арналған арнайы кездесулер мен түсіндіру шаралары тұрақты өткізіліп келе жатқанын айтты.
Ал аудандық полиция бөлімінің бастығының орынбасары Досым Әбуов қоғамдық қауіпсіздікті қамтамасыз ету бағытындағы жұмыстарды баяндады. Оның айтуынша, аудан көлемінде түнгі рейдтік іс-шаралар, профилактикалық тексерулер мен құқық бұзушылықтың алдын алуға бағытталған кешенді жұмыстар тұрақты түрде жүргізілуде. Әсіресе, кәмелетке толмағандардың түнгі уақытта заңды өкілінсіз жүру деректерін анықтау және жастар арасындағы қылмыстың алдын алу бағытындағы шаралар күшейтілген.
Жиын барысында қатысушылар тарапынан да бірқатар ұсыныс-пікірлер айтылды. Тұрғындар қоғамдық тәртіпті сақтау, жастар тәрбиесіне қоғам болып атсалысу және құқықтық мәдениетті қалыптастыру бағытындағы жұмыстарды одан әрі күшейту қажеттігін көтерді.
Мәжіліс қорытындысында аудан әкімі Айтбай Жандарбеков заң мен тәртіп – қоғам тұрақтылығының басты кепілі екенін атап өтті. Сонымен қатар, жауапты сала басшыларына нақты тапсырмалар жүктеп, қоғамдық қауіпсіздікті қамтамасыз ету бағытындағы жұмыстарды жүйелі түрде жалғастыру қажеттігін айтты.
Айта кетейік, «Шиелі – қауіпсіз аудан, жарқын болашақтың мекені» және «Саналы ұрпақ» жобалары аясындағы мұндай шаралар алдағы уақытта да жалғасып, қоғамдағы тәртіп пен тұрақтылықты нығайтуға бағытталмақ.
