Шиелі кентінде «КНК Кемикал» ЖШС ұжымымен ақпараттық кездесу ұйымдастырылды. Басқосу барысында қатысушыларға жаңа Конституция жобасында қарастырылған өзгерістер мен жаңашылдықтар туралы түсіндіру жұмыстары жүргізілді.
Кездесу кезінде Қазақстанның Халық Кеңесінің рөлі мен маңызы кеңінен айтылды. Мамандар бұл құрылым халықтың мүддесін білдіретін әрі заң шығару бастамасы құқығына ие жоғары консультативтік орган ретінде қызмет атқаратынын атап өтті.
Сонымен қатар жиында алдағы референдумның маңыздылығы да кеңінен талқыланды. Қатысушыларға референдум – әрбір азаматтың мемлекет өміріндегі маңызды шешімдерге тікелей қатысуына мүмкіндік беретін демократиялық тетік екені түсіндірілді. Осы арқылы халық қоғамдағы өзекті мәселелерге қатысты пікірін білдіріп, ел дамуына үлес қоса алатыны айтылды.
Кездесу барысында аудандық қоғамдық даму бөлімінің басшысы Кенжехан Есенбаев заң жобасына қатысты ақпаратпен мұқият танысып, алдағы саяси науқанда белсенділік танытуға шақырды. Сондай-ақ жиын кезінде кәсіпорын қызметкерлері өздерін қызықтырған сұрақтарын қойып, мамандардан тиісті жауап алды.
Ұйымдастырушылардың айтуынша, мұндай кездесулердің басты мақсаты – тұрғындардың құқықтық сауаттылығын арттыру, азаматтық белсенділікті қалыптастыру және мемлекеттік маңызы бар қоғамдық-саяси іс-шараларға қатысуға ынталандыру болатыны сөзсіз делінген.
