Сырдария ауданында жол инфрақұрылымын дамыту мәселелері қаралды. Аудан әкімі Берік Сәрменбаевтың төрағалығымен өткен мәжілісте автожол саласын дамыту және Үкімет отырысынан кейін облыс әкімі тарапынан берілген тапсырмаларды аудан көлемінде сапалы әрі уақытылы орындау жолдары талқыланды.
Жиында аудан басшысы соңғы жылдары жол құрылысына ерекше көңіл бөлініп отырғанын атап өтті. Оның айтуынша, Мемлекет басшысы, Үкімет және облыс әкімдігі тарапынан көрсетілген қолдаудың арқасында аудан аумағында жолдарды жөндеу және жаңарту жұмыстары жүйелі түрде жүргізілуде. Нәтижесінде елді мекендердің бірқатар ішкі көшелері орташа және күрделі жөндеуден өткен.
– Өткен жылы аудан бойынша жол саласына қатысты 9 жоба жүзеге асырылып, бұл мақсатқа 1,3 млрд теңге бөлінді. Соның нәтижесінде 12 көшеге күрделі жөндеу жүргізілді. Сонымен қатар 17 көшеге қиыршық тас төселіп, аудандық маңызы бар 10,2 шақырым жолға орташа жөндеу жұмыстары атқарылды. Қазіргі таңда жолдардың жақсы және қанағаттанарлық деңгейдегі үлесі 99 пайызға жетті. Алдағы уақытта да жол құрылысы мен жөндеу жұмыстарының сапасы қатаң бақылауда болып, барлық жобалар белгіленген мерзімде әрі талапқа сай аяқталады, – деді аудан әкімі.
Мәжіліс қорытындысында күн тәртібіндегі мәселелер бойынша жауапты бөлім басшыларына, сондай-ақ кент және ауылдық округ әкімдеріне нақты міндеттер жүктеліп, жол саласындағы жұмыстарды тиімді әрі жүйелі жүргізу тапсырылды.
