Аудан әкімі Айтбай Жандарбековтың төрағалығымен кезекті аппараттық мәжіліс ұйымдастырылып, ауданның әлеуметтік-экономикалық дамуы мен өзекті салалық мәселелер талқыға түсті.
Жиын барысында негізгі назар ауданның әлеуметтік-экономикалық көрсеткіштерінің орындалуы мен республикалық бюджеттің игерілу қорытындыларына аударылды. Жауапты сала басшылары атқарылған жұмыстарды баяндап, алдағы кезеңге арналған жоспарларымен бөлісті.
Сонымен қатар, күн тәртібінде бірқатар маңызды мәселелер қаралды. Атап айтқанда, көктемгі дала жұмыстарының барысы сөз болып, егіс науқанының ұйымдастырылуы, техника мен тұқым дайындығы, жанар-жағармаймен қамту деңгейі пысықталды. Бұл бағыттағы жұмыстардың жоспарға сәйкес жүргізіліп жатқаны айтылды.
Суармалы егіншілікке қатысты аяқ су мәселесі де назардан тыс қалмады. Суару маусымына дайындық, каналдарды тазалау және су бөлу тетіктері талқыланып, шаруаларды сумен қамту шаралары сараланды.
Мәжілісте сондай-ақ әскерге шақыру науқанының орындалу барысы қаралды. Өткен жылдың қорытындылары мен биылғы көктемгі шақыру жұмыстарының деңгейі айтылып, жоспарлы көрсеткіштерді орындау міндеті қойылды.
Өрт қауіпсіздігін қамтамасыз ету мәселесі бойынша өңірдегі ахуал, алдын алу жұмыстары және арнайы техникалардың дайындығы туралы мәлімет берілді. Дала өрттерінің алдын алу шараларын күшейту қажеттігі атап өтілді.
Бұдан бөлек, аудан орталығындағы жарнама тақтайшаларының жай-күйі қаралып, оларды ретке келтіру және заң талаптарына сәйкестендіру мәселелері талқыланды.
Жиын қорытындысында аудан әкімі көтерілген барлық мәселелер бойынша нақты тапсырмалар беріп, олардың уақытылы әрі сапалы орындалуын қатаң бақылауға алуды міндеттеді.
