Сырдария ауданында Наурыз мейрамыне орай «Армысың, әз Наурыз!» атты мерекелік іс-шара кең көлемде ұйымдастырылды. Орталық алаңда өткен салтанатты жиынға облыс әкімінің орынбасары Ардақ Зебешев, аудан әкімі Берік Сәрменбаев, «AMANAT» партиясының облыстық филиал төрағасы Жандос Базартай, қоғам қайраткері Әріп Хожбанов және аудан тұрғындары қатысты.
Шара барысында облыс әкімінің орынбасары жиналған жұртшылықты мерекемен құттықтап, әз-Наурыздың бірлік пен жаңарудың символы екенін атап өтті. Сондай-ақ, Қасым-Жомарт Тоқаев бастамасымен енгізілген «Наурызнама» онкүндігі аясында ұлттық мерекенің мазмұны жаңарып, ауқымы кеңейгенін жеткізді. Аймақ басшысы Нұрлыбек Нәлібаев атынан да ізгі тілектер айтылды.
Мерекелік жиында өңірдің дамуына үлес қосқан бірқатар азаматтарға облыстық марапаттар табысталды. Сонымен қатар, қоғам қайраткері Әріп Хожбанов ақжарма тілегін білдіріп, Наурыздың рухани маңызына тоқталды.
Өз кезегінде аудан әкімі Берік Сәрменбаев та тұрғындарды мерекемен құттықтап, бұл күннің татулық пен ізгіліктің, жаңару мен жасампаздықтың нышаны екенін атап өтті. Ол ұлттық құндылықтарды дәріптейтін әз-Наурыздың елге құт-береке әкелуіне тілектестік білдірді.
Салтанатты іс-шара барысында ауданның әлеуметтік-экономикалық дамуына үлес қосқан азаматтар аудан әкімінің алғыс хаттарымен марапатталды. Мереке ұлттық дәстүрлерге негізделген көріністермен, мәдени бағдарламалармен жалғасып, концерттік қойылымдар мен спорттық жарыстарға ұласты.
