Облыс әкімі Нұрлыбек Нәлібаев азаматтарды жеке мәселелері бойынша қабылдады. Кезектілік тәртібімен ұйымдастырылған қабылдауға 20 тұрғын тіркеліп, олардың бірі онлайн форматта қатысты.
Қабылдау барысында тұрғындардың басым бөлігі әлеуметтік қолдау, тұрғын үймен қамту, коммуналдық қызмет сапасы, көше жөндеу және жұмыспен қамту мәселелерін көтерді.
Аймақ басшысы тұрғын үй беру заң талаптарына сәйкес кезек тәртібімен жүзеге асырылатынын атап өтті. Қазіргі таңда өңірде халық сұранысына сай көпқабатты тұрғын үйлердің құрылысы қарқын алған. Сонымен қатар, тұрғындарды уақытша баспанамен қамтамасыз ету жұмыстары да жүйелі жүргізілуде. Қабылдау барысында төрт баланы тәрбиелеп отырған жалғызбасты анаға уақытша тұрғын үй ұсынылды.
Шиелі ауданына қарасты Сұлутөбе ауылының ақсақалдары Құмжарған каналын қазу жұмыстарының басталғанына ризашылықтарын білдірді. Аталған жоба егістік алқаптарын сумен қамтамасыз етіп, ауыл шаруашылығының дамуына оң әсерін тигізбек.
Ал Қазалы ауданының тұрғыны өз мамандығы бойынша жұмысқа орналасу мәселесін көтерді. Облыс әкімі бұл бағыттағы жұмыстар заң аясында қарастырылып, еңбекпен қамту мәселесі тұрақты назарда болатынын жеткізді.
Жалпы, қабылдауда көтерілген мәселелер кезең-кезеңімен заң талаптарына сәйкес шешімін тауып келеді. Бұл жолы да әрбір өтініш бойынша жауапты сала басшыларына нақты тапсырмалар жүктелді.
Айта кетейік, облыс әкімінің қабылдауына жазылу үшін тұрғындар egov порталы, e-Otinish бірыңғай базасы арқылы немесе әкімдікке жазбаша өтініш беру арқылы тіркеле алады.
