Шиелі ауданындағы №48 Ә. Қоңыратбаев атындағы мектеп-лицейі базасында жастар тәрбиесіне бағытталған тағылымды кездесу өтті. Іс-шараға оқушылар мен ұстаздар қатысып, қоғамдағы өзекті мәселелер төңірегінде мазмұнды пікір алмасу ұйымдастырылды.
Кездесу барысында ақпараттық-түсіндіру тобының (РАТТ) мүшесі, теолог Бауыржан Қуанышбайұлы жастарға экстремистік және радикалды діни ағымдардың қауіптілігі туралы кеңінен түсіндірді. Ол діни сауаттылықтың маңызын атап өтіп, жасөспірімдерді теріс идеологиядан сақтануға шақырды. Маманның айтуынша, дұрыс рухани бағдар қалыптастыру – өскелең ұрпақтың қауіпсіз әрі саналы дамуының негізгі кепілі.
Сонымен қатар, Аудандық қоғамдық даму бөлімі басшысы Кенжехан Есенбаев интернет алаяқтықтың алдын алу тақырыбында сөз сөйлеп, қазіргі таңда жиі кездесетін киберқылмыс түрлері мен одан қорғану жолдарын түсіндірді. Ол азаматтарды жеке деректерді қорғауға, күмәнді ақпарат көздеріне сенбеуге және цифрлық қауіпсіздік талаптарын сақтауға шақырды.
Жиын барысында жастарға қоғамдағы тұрақтылықты сақтау, заңға құрметпен қарау және жеке жауапкершілікті арттыру мәселелері де кеңінен айтылды. Мамандардың пікірінше, мұндай кездесулер жас буынның дүниетанымын кеңейтіп, оларды түрлі қауіп-қатерден сақтандыруда маңызды рөл атқарады.
Ұйымдастырушылар атап өткендей, аудандық қоғамдық даму бөлімі өңірдегі қоғамдық келісім мен тұрақтылықты нығайту, жастар саясатын дамыту және ақпараттық-түсіндіру жұмыстарын жүйелі жүргізу арқылы қоғам қауіпсіздігін қамтамасыз етуге үлес қосып келеді.
Кездесу соңында қатысушылар мамандарға алғыс білдіріп, мұндай тағылымды іс-шаралардың алдағы уақытта да жалғасын табуына тілектестік танытты.
