Сырдария ауданында «Таза Қазақстан» экологиялық акциясы аясында ауқымды сенбілік ұйымдастырылып, санитарлық тазалық жұмыстары қарқынды жүргізілді. Игі шара аудан орталығын ғана емес, барлық елді мекендерді қамтып, көпшіліктің белсенді қатысуымен өтті.
Тазалық жұмыстарына меншік түріне қарамастан барлық мекемелер мен ұйымдар жұмылдырылды. Әр ұжым өздеріне бекітілген аумақтарда тазалық жұмыстарын жүргізіп, көшелерді қоқыстан арылтып, айналаны абаттандыруға үлес қосты. Сонымен қатар, көркейту-көгалдандыру бағытында бірқатар жұмыстар атқарылып, қоғамдық орындардың келбеті жақсара түсті.
Сенбілік барысында көшелер мен аулалар тазартылып қана қоймай, жасыл аймақтарды күтіп-баптау, ағаш отырғызу, шөп шабу секілді жұмыстар да қатар жүргізілді. Бұл шаралар қоршаған ортаның тазалығын сақтауға және тұрғындар үшін қолайлы өмір сүру ортасын қалыптастыруға бағытталған.
Ұйымдастырушылардың айтуынша, мұндай экологиялық акциялар тек бір күндік шара емес, ол – қоғамда тазалық мәдениетін қалыптастырудың маңызды тетігі. Осы арқылы тұрғындардың қоршаған ортаға деген жауапкершілігін арттыру көзделіп отыр.
Айта кету керек, «Таза Қазақстан» акциясы аясындағы сенбіліктер алдағы уақытта да тұрақты түрде жалғасын табады. Бұл бастама ауданның экологиялық жағдайын жақсартуға және елді мекендердің көркеюіне оң ықпал етпек.
Осы орайда аудан тұрғындарына тазалықты тек сенбілік кезінде ғана емес, күнделікті өмірде де сақтаудың маңызы зор екені аудан әкімдігі тарапынан ескертілді. Туған жердің тазалығы – әрбір азаматтың ортақ міндеті.
