Шиелі ауданында 1 мамыр – Қазақстан халқының бірлігі күні ерекше сән-салтанатпен аталып өтті. «Достық жыры мен бірлік әні» атты мерекелік іс-шара аудан тұрғындарын ортақ құндылықтар төңірегіне топтастырып, татулық пен келісімнің жарқын үлгісін көрсетті.
Мерекелік шара аясында этнос өкілдерінің мәдениет көрмесі ұйымдастырылып, көпшілікке әр ұлттың салт-дәстүрі, қолөнері мен ұлттық тағамдары таныстырылды. Көрме қонақтарға Қазақстанды мекен еткен түрлі халықтардың мәдени байлығын тереңірек тануға мүмкіндік берді. Аудан әкімі Айтбай Жандарбеков көрмені аралап, этнос өкілдерінің өнеріне жоғары баға берді.
Салтанатты жиында сөз сөйлеген аудан басшысы тұрғындарды айтулы мерекемен құттықтап, ел ішіндегі бейбітшілік пен тұрақтылықтың маңыздылығына ерекше тоқталды. Оның айтуынша, Қазақстан халқының бірлігі күні – түрлі этностар арасындағы достық пен өзара құрметтің символы. Сонымен қатар, ол қоғамдық келісім мен бірлікті нығайтудағы Қазақстан халқы Ассамблеясының рөліне тоқталып, бұл институттың елдегі тұрақтылықтың берік негізіне айналғанын атап өтті.
Аудан әкімі Мемлекет басшысы Қасым-Жомарт Тоқаевтың бейбітшілік пен келісімге қатысты ұстанымын мысалға келтіріп, бұл құндылықтардың ел дамуының басты тірегі екенін жеткізді. Оның пікірінше, бірлік пен ынтымақ – кез келген қоғамның алға жылжуына серпін беретін негізгі күш.
Іс-шара концерттік бағдарламаға ұласып, жергілікті өнерпаздар мен түрлі этнос өкілдері сахна төрінде ән мен биден шашу шашты. Ұлттық билер мен әсем әуендер көрермендерге көтеріңкі көңіл күй сыйлап, көпұлтты мәдениеттің әсем үйлесімін паш етті.
Жалпы, мерекелік шара аудан тұрғындарына ерекше әсер қалдырып, бірлік пен татулықтың маңызын тағы бір мәрте айшықтай түсті. Бұл күн – ел ішіндегі достық пен өзара түсіністіктің нығайып, ортақ мақсат жолындағы ынтымақтың арта түскенінің айқын көрінісі болды.
