Кеше Шиелі ауданында ел көлемінде жүзеге асырылып жатқан «Таза Қазақстан» экологиялық бағдарламасы аясында ауқымды тазалық шарасы ұйымдастырылды. Мемлекет басшысының бастамасын қолдаған бұл игі іс аймақ басшылығының тапсырмасен жүйелі түрде жалғасып келеді. Соның бір көрінісі ретінде «Тағзым орны таза болсын, рух пен тазалық – бір ұғым» атты жалпыхалықтық акция өтті.
Шараға аудан әкімдігі ұйытқы болып, өңірдегі тарихи-мәдени мұра нысандары мен киелі орындарды тазарту жұмыстары кең көлемде жүргізілді. Аудан аумағындағы бірқатар маңызды ескерткіштер мен кесенелердің айналасы ретке келтіріліп, абаттандыру жұмыстары қолға алынды. Тазалық жұмыстары қасиетті орындардың тарихи келбетін сақтаумен қатар, олардың маңызын насихаттауға да бағытталды.
Атап айтқанда, ел тарихында ерекше орны бар бірқатар кесенелер мен табиғи-тарихи нысандар қамтылды. Сонымен қатар аудан аумағындағы қорымдар толықтай тазартылып, ретке келтірілді. Бұл жұмыстар халықтың рухани мұраға деген құрметін арттыруға сеп болды.
Жалпы, Шиелі ауданында бүгінгі таңда мемлекет қорғауына алынған 42 тарихи-мәдени ескерткіш бар. Оның ішінде республикалық және жергілікті маңызы бар нысандар, сондай-ақ алдын ала есепке алынған тарихи орындар бар. Бұл көрсеткіш ауданның тарихи әлеуетінің жоғары екенін айғақтайды.
Ауқымды шараға екі мыңға жуық тұрғын белсенді қатысып, ортақ іске өз үлестерін қосты. Акция барысында халық қалаулылары, мемлекеттік қызметкерлер, еріктілер, ардагерлер мен жастар бір кісідей жұмылып, туған жердің тазалығы мен көркеюіне атсалысты.
Ұйымдастырушылардың айтуынша, мұндай игі бастамалар алдағы уақытта да жалғасып, өңірдің экологиялық жағдайын жақсартумен қатар, рухани құндылықтарды дәріптеуге бағыттала бермек.
