Шиелі ауданындағы Руханият орталығында өткен «Кітап шамы сөнбеген түн» атты ерекше форматтағы караоке кеші оқырмандарға ұмытылмас әсер сыйлады. Кітапхана қабырғасында ұйымдастырылған бұл шара дәстүрлі әдеби кештің шеңберінен шығып, заманауи үрдістермен үйлескен тың бастама ретінде көпшіліктің көңілінен шықты.
Кештің басты мақсаты – оқырмандарды кітап оқуға баулу, кітапханаға деген қызығушылықты арттыру, әдебиетке сүйіспеншілікті ояту және жастардың бос уақытын тиімді әрі мазмұнды ұйымдастыру болды. Ұйымдастырушылар бұл жолы қатысушыларға тек рухани азық беріп қана қоймай, оларды белсенді әрекетке тартудың жаңа тәсілдерін де ұсынды.
Шара аясында ерекше назар аудартқан бөлім – цифрлық технологиялармен ұштастырылған интерактивті алаң болды. Арнайы әзірленген смарт QR-кодтар арқылы қатысушылар өз смартфондарының көмегімен онлайн платформаға қосылып, әдебиетке қатысты викториналық сұрақтарға жауап берді. Сұрақтар мазмұны кітаптар, белгілі авторлар мен әдеби кейіпкерлер төңірегінде өрбіді. Қатысушылардың білім деңгейі бірден бағаланып, үздіктер анықталды.
Мұндай формат, әсіресе, жастардың қызығушылығын арттырып, кітапханаға деген көзқарасты жаңаша қалыптастыруға ықпал етті. Цифрлық мүмкіндіктер мен дәстүрлі әдебиеттің үйлесуі кешке ерекше серпін беріп, қатысушыларды белсенділікке жетеледі.
Кештің тағы бір жарқын бөлігі – еркін форматтағы караоке бағдарламасы болды. Қатысушылар сахнаға шығып, өз қалаған әндерін орындап, өнерлерін ортаға салды. Әсіресе, қазақ музыкасының көрнекті өкілі Шәмші Қалдаяқов әндерінің шырқалуы кештің шырайын кіргізді. «Әнім сен едің», «Менің Қазақстаным» сынды жүрекке жақын туындылар кеш қонақтарын ерекше күйге бөлеп, ортақ рухани атмосфера қалыптастырды.
Әуезді әндер мен мазмұнды сұхбаттар, әдеби викториналар мен достық көңіл-күй астасқан бұл кеш – тек мәдени шара ғана емес, рухани демалыстың үлгісіне айналды. Қатысушылар өзара пікір алмасып, кітап туралы ой бөлісіп, жаңа таныстықтар орнатуға мүмкіндік алды.
«Кітап шамы сөнбеген түн» — кітап пен музыканың, дәстүр мен жаңашылдықтың тоғысқан тұсы болды. Мұндай форматтағы кештер оқырман мен кітапхана арасындағы байланысты нығайтып қана қоймай, жастарды рухани құндылықтарға жақындатудың тиімді жолы екенін көрсетті.
