Қызылорда облыстық АИТВ инфекциясының алдын алу орталығы-ның Шиелі аудандық филиалы ұйымдастыруымен медицина қызметкерлеріне арналған маңызды семинар өтті. Іс-шара Шиелі ауданаралық көпбейінді ауруханасы базасында өтіп, перзентхана бөлімшесінің акушерлері мен аяжандары қамтылды.
Семинардың негізгі мақсаты – медицина қызметкерлері арасында АИТВ инфекциясына қатысты стигма мен дискриминацияның алдын алу, сондай-ақ жедел тестілеу жүргізудің заманауи стандарттарын түсіндіру және тәжірибеде қолдану дағдыларын жетілдіру.
Іс-шара барысында орталықтың ИФА зертханасының маманы Ж.Тілеуберген мен дәрігер-инфекционист А.Молдабекова қатысушыларға АИТВ инфекциясының таралу жолдары, оның алдын алу шаралары және науқастармен қарым-қатынас жасаудағы кәсіби этика мәселелері жөнінде жан-жақты ақпарат берді. Мамандар әсіресе қоғамда әлі де кездесетін жаңсақ пікірлер мен кемсітушілік көзқарастардың медицина сапасына кері әсер ететінін атап өтті.
Сонымен қатар, семинарда жедел тест жүргізудің халықаралық талаптарға сай алгоритмдері түсіндіріліп, практикалық дағдылар пысықталды. Қатысушылар тестілеу барысында қауіпсіздік шараларын сақтау, нәтижелерді дұрыс интерпретациялау және пациенттерге психологиялық қолдау көрсету мәселелеріне ерекше назар аударды.
Мамандардың айтуынша, мұндай оқыту шаралары медицина қызметкерлерінің кәсіби біліктілігін арттырып қана қоймай, АИТВ инфекциясына қатысты қоғамдағы стигма мен дискриминацияны азайтуға ықпал етеді. Бұл өз кезегінде халықтың денсаулығын қорғау мен инфекцияның таралуын тежеуде маңызды рөл атқарады.
Семинар соңында қатысушылар өзара пікір алмасып, тәжірибелік сұрақтарын қойып, күнделікті жұмыс барысында кездесетін күрделі жағдайларды талқылады. Осындай мазмұнды кездесулер алдағы уақытта да жалғасын табады деп күтілуде.
