Шиелі ауданында мал ұрлығының алдын алу және құқықбұзушылықтардың жолын кесу мақсатында кешенді шаралар қолға алынуда. Осы бағытта “Мал ұрлығына жол жоқ” жедел профилактикалық іс-шарасы аясында құқық қорғау органдары тарапынан бірқатар нақты жұмыстар жүргізілуде.
Аталған іс-шара – ауыл шаруашылығы дамыған өңір үшін аса маңызды. Себебі мал шаруашылығы – аудан тұрғындарының негізгі табыс көздерінің бірі. Сондықтан төрт түліктің қауіпсіздігін қамтамасыз ету тек құқық қорғау органдарының ғана емес, жалпы қоғамның ортақ міндетіне айналып отыр.
Профилактикалық шаралар барысында учаскелік полиция инспекторлары ауылдық округтерді аралап, шаруа қожалықтарына арнайы тексеру жұмыстарын жүргізді. Тексеру кезінде мал ұстау талаптарының сақталуы, қора-жайлардың қауіпсіздігі, малды таңбалау және есепке алу мәселелері назарға алынды. Сонымен қатар, мал иелеріне заң талаптары түсіндіріліп, құқықтық кеңестер берілді.
Полиция қызметкерлері әсіресе түнгі уақытта қырағылықты күшейту, малды қараусыз қалдырмау және күмәнді жағдайлар байқалған сәтте бірден тиісті органдарға хабарлау қажеттігін ескертті. Өйткені мал ұрлығы көбіне тұрғындардың салғырттығы мен сақтық шараларын толық сақтамауы салдарынан орын алып жатады.
Құқық қорғау органдарының мәліметінше, мұндай профилактикалық іс-шаралар мал ұрлығының деңгейін төмендетуге оң әсерін тигізуде. Сонымен қатар, тұрғындармен тікелей байланыс орнату арқылы құқық бұзушылықтың алдын алу жұмыстары да күшейтілуде.
Полиция қызметкерлері аудан тұрғындарын қырағылық танытуға шақырып, әрбір азаматтың жеке мүлкіне жауапкершілікпен қарауы маңызды екенін атап өтті. Қауіпсіздік шараларын сақтау – мал ұрлығының алдын алудың ең тиімді жолы.
Жалпы, Шиелі ауданында жүргізіліп жатқан мұндай жүйелі жұмыстар құқықтық тәртіпті нығайтып, ауыл тұрғындарының алаңсыз тіршілігіне негіз болмақ.
