Сырдария ауданында нашақорлықтың алдын алу және есірткі қылмысына қарсы іс-қимыл бағытындағы жұмыстар жүйелі түрде жүргізілуде. Осы мақсатта облыстық ведомствоаралық штаб отырысының хаттамасына сәйкес, мемлекеттік органдардың өзара іс-қимылын күшейтуге бағытталған бірқатар кешенді шаралар жүзеге асырылды.
Атап айтқанда, аудан аумағында орман қорғаушы, ауылдық учаскелік полиция майоры және ветеринария саласының маманы бірлесіп, есірткі өсімдіктері өсірілуі мүмкін аумақтарға аралау жұмыстарын жүргізді.
Бұл шараның негізгі мақсаты – заңсыз есірткі өсімдіктерінің егілуіне жол бермеу, күдікті алқаптарды дер кезінде анықтау және алдын алу жұмыстарын күшейту болып табылады. Аралау барысында елді мекендер маңындағы ашық аумақтар, егістік алқаптар мен бос жер телімдері жіті тексерілді.
Мамандар тарапынан жүргізілген мониторинг барысында табиғи ортадағы өсімдіктердің жағдайы зерделеніп, күдік тудыратын аумақтарға ерекше назар аударылды. Сонымен қатар, жергілікті тұрғындармен түсіндіру жұмыстары жүргізіліп, заңсыз есірткі айналымына қатысты жауапкершілік қатаң екені ескертілді.
Ауылдық учаскелік полиция майоры құқық қорғау органдарының негізгі міндеттерінің бірі – есірткі қылмысының алдын алу екенін атап өтіп, мұндай бірлескен рейдтердің тұрақты түрде ұйымдастырылатынын жеткізді. Ал орман қорғау саласының маманы табиғи аумақтардың бақылауда ұсталып, заңсыз егістікке жол бермеу бағытында жүйелі жұмыстар жалғасатынын айтты.
Ветеринария саласының маманы да ауылдық аймақтарда биологиялық және санитарлық бақылаудың маңыздылығына тоқталып, кешенді тексерулердің өңірлік қауіпсіздік үшін маңызды екенін атап өтті.
Жалпы, аудан көлемінде нашақорлықтың алдын алу және есірткі қылмысына қарсы күрес бағытындағы мұндай ведомствоаралық іс-шаралар тұрақты түрде ұйымдастырылып келеді. Бұл өз кезегінде құқық бұзушылықтың алдын алып, қоғамдық қауіпсіздікті қамтамасыз етуге және тұрғындардың өмір сүру сапасын арттыруға ықпал етеді.
