Шиелі кентінде абаттандыру және санитарлық тазалық жұмыстары жүйелі түрде жалғасып, аудан басшылығының тұрақты бақылауында тұр. Осыған орай аудан әкімі Айтбай Жандарбеков тиісті сала жетекшілерімен бірге кент аумағын аралап, көркейту-көгалдандыру бағытында атқарылып жатқан жұмыстардың барысымен танысты.
Жұмыс сапары барысында кент көшелерінің тазалығы, жасыл желектерді отырғызу, гүлзарларды күтіп-баптау, демалыс аймақтарын ретке келтіру мәселелері жан-жақты қаралды. Сонымен қатар, мемлекеттік мекемелер мен кәсіпкерлік нысандардың сыртқы келбеті, аумақтарының тазалығы да назардан тыс қалмады. Аудан басшысы әрбір нысанның жалпы келбетке әсер ететінін атап өтіп, бұл бағыттағы жұмыстардың сапалы әрі уақытылы орындалуын қатаң тапсырды.
Аралау қорытындысы бойынша жауапты мекеме басшыларына нақты міндеттер жүктелді. Әсіресе, көгалдандыру жұмыстарының жүйелілігін сақтау, отырғызылған көшеттердің күтімін күшейту, қоғамдық орындардың тазалығын тұрақты бақылауда ұстау қажеттігі ескертілді.
Айтбай Жандарбеков өз сөзінде ауданның көркеюі мен тазалығы – баршаға ортақ міндет екенін ерекше атап өтті. Оның айтуынша, тұрғындар үшін қолайлы әрі таза орта қалыптастыру тек мемлекеттік органдардың ғана емес, әрбір азаматтың жауапкершілігіне байланысты. Осы ретте аудан әкімі «Таза Қазақстан» экологиялық бағдарламасының маңыздылығына тоқталып, барлық сала қызметкерлерін бұл бастамаға белсенді қатысуға шақырды.
Сонымен қатар, жеке кәсіпкерлерге де нақты талаптар қойылды. Атап айтқанда, әрбір кәсіпкер өз нысанының аумағын қоқыстан тазартып, ғимараттың сыртқы келбетін ретке келтіруге, іргелес аумақты абаттандыруға міндетті екені ескертілді. Бұл талаптар кенттің жалпы сәулеттік келбетін жақсартуға бағытталған.
Аудан басшысы еліміз бойынша жүзеге асып жатқан тазалық акцияларына бейжай қарауға болмайтынын атап өтіп, тазалық жұмыстарын тұрақты түрде жүргізуді тапсырды. Сонымен қатар, анықталған кемшіліктерді дер кезінде жою, жауапты тұлғалардың жұмысына бақылауды күшейту қажеттігін қадап айтты.
Жалпы, Шиелі кентіндегі абаттандыру және санитарлық тазалық жұмыстары алдағы уақытта да жүйелі түрде жалғасып, тұрғындарға қолайлы өмір сүру ортасын қалыптастыруға бағыттала бермек.
